VIERS IL FRIÛL. Sapade e torne a cjase

Nol è un mâl che nol sedi ancje un ben. Il fat che il guvier Letta al sedi colât e che Renzi al vedi decidût di zuiâ di azart, riscjant dut cence passâ pes elezions, al pues evitâ che il passaç di Sapade al Friûl si torni a impantanâ. Lu crodin ancje i components dal Comitât sapadin che al sta puartant indenant la bataie che – lu ricuardìn – tal mês di Dicembar passât, in gracie di dôs senatoris, Isabella De Monte dal Pd e Raffaella Bellot de Leghe, e à viodût la Comission bicamerâl pai Afârs Costituzionâi votâ a favôr dal passaç di regjon pal comun dal Cjadovri midiant di une leç ordenarie, e duncje in maniere plui rapide rispiet a ce che e previodarès une leç costituzionâl. Al sarès impuartant però, cumò che la cuistion e je ancjemò cjalde, che la presidente Serracchiani, cun dute la sô visibilitât, e salti fûr diretementri a sostignî i sapadins. “Nô o vin metût il balon su pal dischet – al spieghe Alessandro Mauro, puartevôs dal Comitât – , cumò il rigôr in puarte lu pues tirâ dome la Regjon Friûl Vignesie Julie”.
In fat, se la leç e je stade incancarade tal so just iter parlamentâr, cumò e je cuistion di sburtâ tes aulis dal Senât par fâ passâ il proviodiment in maniere definitive che, câs plui unic che râr, al à za otignût la aprovazion in sede deliberant de comission. Par chest, al sarès determinant che la Regjon, midiant magari ancje dai siei uficis di rapresentance a Rome, si fasi valê pardabon.
Intant, ancje a Sapade in Primevere si larà a votâ pal rinovament dal Consei Comunâl e, propit in viste di chest apontament, il Comitât si sta movint par fâ cjapâ ai candidats sindics une posizion nete pal passaç di regjon ma ancje par jessi presints cun candidâts conseîrs trasversâi aes listis, che une volte elets a continuaran a puartâ indenant il percors di rientri in Friûl. E po dopo, l’auspici di ducj al è che i rapuarts cui comuns de Cjargne, soredut chei de Val dal Dean, si strenzin simpri di plui, tacant magari cul rinfuarçâ la colaborazion pes pistis di schi. ❚
Il Cjargnel