VIERS IL FRIÛL. E ancje la relazion tecniche e somee pronte: politics, ce spietaiso?

La relazion tecniche su lis ripercussions finanziaris che a saressin gjeneradis dal tornâ di Sapade-Plodn al Friûl e je pronte, dome di meti a disposizion de Comission Belanç dal Senât, che e sarà clamade a dâ il so parê pal vie libare definitîf ae leç di passaç di regjon pal comun.
La notizie si le à savude ae fin dal mês di Avrîl ma sul so contignût no je stade ancjemò clarece e uficialitât. Lis vôs di coridôr a disin che lis valutazions de Resonarie gjenerâl no son stadis trop a pro dal paîs dal Cjadovri, stant che – cul cambi di Regjon – la butade fiscâl che rive in dì di vuê a Rome un doman si sbassarès un grum par vie dal fatôr di autonomie fiscâl da Friûl. Considerazions che però si podaressin subit ribati cui sparagns contemporaniis inte spese sanitarie dal Stât, viodût che la nestre regjon a statût speciâl, a diference dal Venit, si paie di bessole ospedâi e medisinâi. I sapadins a son stufs di tribulâ, e par chest tes setemanis passadis a son lâts in place, promovint une manifestazion par riclamâ la politiche, soredut chê romane, a niçâsi e a decidisi une buine volte suntune domande che, impensìnsi, dopo dal referendum dal 2008 e à vût il benstâ di dutis dôs lis Provinciis e di dutis dôs lis Regjon interessadis. ❚
David Zanirato