Une scjatule plene di peraulis: il gnûf zûc didatic che al jude a capî chei altris

“99 Peraulis_Fevelâ cul mont, Parlare col mondo, Talking to the world” al è l’ultin lavôr editoriâl di Silvana Schiavi Fachin, docente e formadore esperte di didatiche plurilengâl.
Un gnûf format ludic didatic de Golaine “99domande”, presentât a forme di scjatule cun 99 cjartis di zûc e cun ancjetantis peraulis dissegnadis dai fantats dal Centri Diurni Punto Zero, cu la colaborazion de ilustradore e cjâf dal progjet “Gjenetichementri Diferent” Patrizia Geremia. Lis peraulis, i proverbis, lis cjançons, lis rimis e lis poesiis, a son declinadis in 15 lenghis. L’obietîf al è chel di puartâ i fruts ae scuvierte graduâl des analogjiis e des diferencis che a esistin fra lis diferentis visions dal mont dai popui de Tiere, e a capî lis corispondencis o lis divergjencis che a son fra i elements lessicâi che lis lenghis a doprin par palesâ la diversitât culturâl e di pinsîr. L’ûs didatic dal zûc al pues partî dai dissens par scuvierzi ce che i fruts za a san sui ogjets e su lis ilustrazions, lassant che si esprimin te lenghe che a cognossin miôr: il furlan, il talian, ma ancje lis altris lenghis che a doprin in cjase (par esempli un dialet locâl o di une altre regjon, une altre lenghe dal teritori tant che il sloven o il todesc) o une des lenghis de imigrazion resinte (l’albanês, il cravuat, il rumen).
La publicazion, editade di Futura Edizioni, e à vude la poie de ARLeF – Agjenzie Regjonâl pe Lenghe Furlane e e à un sottitul significatîf: “La lenghe e je musiche”. «Si trate di un imprest didatic pe promozion ae educazion pluriculturâl e interculturâl tant che fonde di une educazion plurilengâl – al marche il president de ARLeF, Lorenzo Fabbro – par judâ i fruts des nestris scuelis e des nestris fameis a cressi cence prejudizis e cence stereotips, ma ancje braurôs dai valôrs alts de lôr tradizion storiche e culturâl». ❚
Redazion