Une sale in memoriedi Boris Pahor ancje a Lubiane

Ai 15 di Jugn ancje la ministre pai Afârs forescj de Republiche di Slovenie, Tanja Fajon, e à ricuardât il scritôr de minorance slovene dal Friûl-Vignesie Julie Boris Pahor. A Lubiane i àn intitulât une sale te sede dal Ministeri.
◆ Diplomatics e politics de Republiche di Slovenie a incuintravin dispès Pahor in ogni bande dal mont e a jerin braurôs di dâi une man a puartâ ator lis sôs testemoneancis. “Al è cetant onôr par me dâ non di Boris Pahor a cheste sale e mi auguri che i events che si davuelzaran achì a rifletin la grandece dal so spirt”, e à dit la ministre.
◆ Tra i tancj ricognossiments che Boris Pahor al à vût, la ministre Fajon e à ricuardât il conferiment dal titul di citadin de Europe, che Pahor al à vût tal Parlament european tal 2014, daûr de iniziative di ducj i vot deputâts europeans slovens di chê volte. Tra chescj e jere ancje la cumò ministre Fajon.
◆ Il titul al jere lât a Pahor pal sô contribût a miorâ la comprension, la colaborazion e il spirt a nivel european. Cu la sô storie e il so lavorâ pe cussience slovene, pe ministre Boris Pahor al reste un model ancje tal so impegn diplomatic.
◆ Tal Ministeri a sperin che la sale Boris Pahor e sedi un puest li che si incuintrin ideis, progjets e politichis, amîs e partners di dut il mont.
◆”Par me e ancje par tancj slovens Boris Pahor al è un garant simbolic de eticitât de slovenitât”, al à dit te suaze de cerimonie il filosof, fotograf e ativist Evgen Bavčar, che al jere ancje amì di Pahor. In tancj agns che al à vivût a Parîs, Bavčar al à ancje presentât lis oparis di Pahor in France. Cussì, dopo li àn cognossudis in Gjermanie, Italie e plui tart in dut il mont.
◆ Ae cerimonie di intitulazion e à partecipat ancje Vesna Humar, la segretarie di Stât dal Ufizi de Republiche di Slovenie pai Slovens des minorancis autoctonis e tal mont. Dal Ufici a àn fat savê che a varessin chê di istituî un font intitulât a Pahor. Al sostignarès formazion, ricercje e creativitât dai zovins slovens no dome in Slovenie, ma ancje tal forest.
◆ Tra i presints ae cerimonie a Lubiane a jerin ancje i presidents des dôs organizazions confederativis de minorance slovene taliane, Ksenija Dobrila pe Union culturâl economiche slovene-Skgz e Walter Bandelj pe Confederazion des organizazions slovenis. ❚