Une maiute in plui lenghis pai 40 agns de leç Basaglia

Passe cent agns indaûr, su la culine di S. Zuan a Triest, al vignì fat sù un dai manicomis plui grancj di Europe. Tal 1978, parsore di chê culine, Franco Basaglia al sdrumà dute la istituzion, butant jù i portons dal manicomi. In dì di vuê no si fevele plui dal Ospedâl Psichiatric Provinciâl, ma ben dal Parc culturâl di S. Zuan. Culì si cjate la cooperative Lister Sartorie Sociâl, un laboratori che al dopre dome tiessûts riciclâts, cuntune colaborazion une vore sintude cun servizis sociâi e sanitaris (Dipartiment di Salût Mentâl, Servizi pes Tossicodipendencis, Cooperativis sociâls, Comun e Provincie di Triest). In ocasion de cunvigne “Democrazia e salute mentale di comunità”, che e je stade fate dai 21 ai 23 di Jugn tal parc di S. Zuan, Lister e à tornât a stampâ la maiute “Da vicino nessuno è normale”, disponibile tes versions taliane, slovene, todescje e ancje furlane (”Di dongje nissun nol è normâl”), in gracie de consulence dal sportel linguistic dal Cirf, il Centri interdipartimentâl pal svilup de lenghe e de culture dal Friûl. La T-shirt si le pues comprâ al presit di 15 euros (5 euros in plui pe spedizion dal câs che si le ordeni su internet).
Informazions al numar 040/3997243. ❚
par cure de redazion