Une isule in lote pal autoguvier

La Corsiche e gjolt di un status aministratîf plui dongje di chel dai teritoris “di là dal mâr” tant che la Martiniche che no di chel des regjons “continentâls”. Cun di fat e je une Coletivitât Teritoriâl cun competence direte ancje su materiis impuartantis. No à un Consei regjonâl, ma une Assemblee cuntun esecutîf. Al è il risultât di un procès di decentrament unic intal stât francês, partît sul imprin dai agns ’80 in gracie de lote puartade indenant dal nazionalisim cors, sei politic che armât.
Tra i moments fondatîfs dal moderni nazionalisim cors si àn i “fats di Aleria” e la repression che i è vignude daûr. Ta cheste localitât, 40 agns indaûr, un grup di militants al veve ocupât la aziende vinicule di un pied-noir (francês de Alzerie) par denunciâ la sô responsabilitât intune gruesse fraude e di Parîs a vevin rispuindût cu la ocupazion militâr de aree e cuntun assalt cun muarts e ferîts. ❚
✒ Carli Pup