Une idee pe promozion dal dialic e de vite in famee

Si clame “PeDiA – Pedagogia del Dialogo e dell’Ascolto” e al è un progjet metût adun de bande de associazion di promozion sociâl e culturâl KLARIS di Udin cul jutori de Regjon Friûl-VJ, cul patrocini de Universitât dal Friûl e dai Comuns di Basilian, Cjarlins, Martignà, Morùs, Premariâs, Remanzâs e Tavagnà e cu la colaborazion des cooperativis Informazione Friulana e Athena.
◆ La iniziative, che il so non al rimande al tiermin latin “paedia” e a chel grêc antîc “paideia” (ducj i doi cul significât di “educazion”), e met dongje diviersis azions a pro dal scambi di buinis prassis e dal disvilup e de condivision di gnovis cognossincis e abilitâts indreçadis a promovi la cualitât de vite familiâr, il dialic e la comprension tra gjenitôrs e fîs. Il progjet è stât inviât il mês passât e al larà dilunc ancjemò fin ae fin di Novembar e al ten dongje laboratoris educatîfs pai fruts, par cure de psicolighe Giulia Stuani, incuintris di formazion cun esperts tant che Marco Pangos, Daniele Fedeli, Andrea Paschetto e Giusy Guarino, une conference finâl e trasmissions tematichis su Radio Onde Furlane. Par savênt di plui: https://klarisweb.wordpress.com/ e www.facebook.com/ AssociazioneKlaris. ❚