«Une azion di roture»: dimissions par Rosalba Perini de Comission su la scuele

La letare e je rivade un mês za fa su la scrivanie dal president de ARLeF, Lorenzo Fabbro. Une letare di dimissions firmade de presidente de “Comission pe valutazion de aplicazion dal insegnament e sul ûs de lenghe furlane tes istituzions scolastichis”, un grup di lavôr che al è stât inviât sot de presidence Zanon, dentri de stesse ARLeF, secont ce che e proviôt la leç 29 dal 2007, cul compit di furnî il termometri sul stât di salût de marilenghe tes nestris scuelis. Duncje, Rosalba Perini che e je e che e reste membri dal comitât tecnic sientific de Agjenzie, e à mandât lis sôs dimissions tant che cjâf grup di chê Comission. “Un at di provocazion”, nus fâs savê.
LA PREMESSE
Ma fasìn un pas indaûr. “Cheste comission – nus spieghe Perini – e je fate di personis che a àn lavorât sore nuie, e che a vevin il compit di condusi ancje lis rilevazions jenfri lis scuelis, propite su lis ativitâts”. Dâts che a son stâts presentât tal Setembar di un an za fa, intes zornadis dedicadis ae scuele furlane. “Po – e continue – si sin metûts a lavorâ par screâ un plan di ricercje gnûf, par indreçâ un implant di valutazion di dutis lis ativitâts che a vignivin fatis a scuele a pro dal furlan, de metodologjie ae didatiche, dai materiâi ai struments, fintremai ae sodisfazion te utence, gjenitôrs includûts. Un implant inovatîf, burît fûr ancje in gracie de colaborazion de professore Nidia Batic, de Universitât dal Friûl e che e je part de Comission. Nô o sin convints che cheste valutazion tes scuelis no puedin fâle ni la ARLeF, ni la Universitât dal Friûl, di bessolis. Si à di fâle cu la scuele, se di no, no à sens”.
UN IMPEGN CHE NOL PUES JESSI SORE NUIE
Il plan al ven presentât al Cda de ARLeF in Mai e la Comission e domande che al sedi finanziât. “Se o metìn jù un implant seri di valutazion che al tire dentri ancje il personâl de scuele, jo no pues domandâ a chescj insegnants, che a son professioniscj de educazion, di lavorâ sore nuie – e spieghe Perini -. Si che duncje o domandavin bêçs, un finanziament, che o speravin al rivàs dal assestament di belanç. Nuie. Nol è rivât nuie: e alore o ai mandade la letarute, cu lis mês dimissions”.
ALTRIS DIMISSIONS A SON PAR RIVÂ
Cheste “Comission Scuele”, che e veve a cjâf Perini, e je ancje componude di Maria Carminati (Membri dal Cts de ARLeF); Bruno Forte (pedagogjist); Silvana Schiavi Fachin (esperte di educazion plurilengâl); Nidia Batic (professore de Universitât dal Friûl, esperte di statistiche e di ricercje valutative); Paola Floreancig (in rapresentance dal Ufici Scolastic Regjonâl); Paola Cencini (referente de marilenghe pal Ufici Scolastic); Enrico Madussi (dirigjent scolastic di Glemone); Carla Cozzi e Liliana Vit (in rapresentance des scuelis te provincie di Pordenon); Monica Medeot, (in rapresentance des scuelis te provincie di Gorizie). Une part di lôr e à za mandade la lôr solidarietât ae Perini, disint che si dimetaran ancje lôr. Forte, Madussi, Batic e Carminati a varessin la lôr letare di dimission, pronte par jessi spedide.
Perini si ise un pôc sustade dal ategjament dentri te ARLeF? “Sustade no, ma la mê intenzion e jere chê di mandâ un segnâl, prontâ une azion di roture. Se no altri, par rispiet viers un grup di lavôr come chel che jo o jeri a cjâf, fat di int cualificade che e à pardabon lavorât pal ben de lenghe e de scuele. O feveli tant che femine di scuele: nol è pussibil no cjatâ cuatri carantans par un implant di valutazion che al vûl coinvolzi il mont de scuele e, tal stes timp, valorizâ mês di lavôr e di professionalitât di esperts”.
Di vie de Prefeture, dut un cidinôr. A dimissions plombadis ae fin di Setembar, nissune rispueste e je rivade dal president, Lorenzo Fabbro. Come che nol è rivât nissun comunicât istituzionâl, ni di ARLeF, ni de regjon. ❚
Oscar Puntel