Un tic di storie

Lis Termis di Darte a jerin cognossudis bielzà in epoche romane. Un document dal 52 prin di Crist al testemonie che la aghe de Bût e rivave a Darte midiant di une condote (cualchi rest al è conservât tal Civic Museu Archeologjic di Zui), e e vignive clamade “Julia”, o “Putens”, par vie dal so odôr di ûf frait.
Daspò che Uns e Langobarts a àn distrut lis Termis, de risultive si torne a sintî fevelâ in gracie di Fabio Quintilliano Ermacora, intal manuscrit “De antiquitatibus Carniae Historia”, scrit tra la fin dal Cinccent e il tacâ dal Sîscent, che al conte de storie antighe de Cjargne de origjin fin ae fin dal Stât Patriarcjâl (1420). O savìn che intal Istât dal 1885 il poete Giosue Carducci al à fat ancje lui lis sôs curis, in chel timp che al à scrit la poesie “Il comune rustico”.
Distrutis dai acjadiments disastrôs de Prime e de Seconde Vuere Mondiâl, lis Termis di Darte a àn tacât a rinassi tai agns Sessante. Une prime part su progjet di Gino Valle, une seconde tal 1982 e la ultime tal 2008, par man dai architets Silvano Varnier e Glauco Glesleri. ❚
✒ A.S.