Un progjet politic… diferent

Si è screât di pôc un gnûf progjet politic autonomist clamât “Un Friûl Diferent”.
Daûr des intenzions dai promotôrs «la iniziative e nas de dibisugne di dâ rispuestis concretis aes necessitâts politichis e aministrativis dal Friûl, intune fase storiche là che la sene politiche taliane e je dominade de confusion.» Lis soluzions, duncje «a son di cirî e di cjatâ a nivel locâl» e «intun sisteme di democrazie di prossimitât.»
Fint ca nissune grande diference cun cualsisei sogjet furlanist, ma “Un Friûl Diferent” al à la particolaritât di declarâsi di çampe, invezit di «fâ part di un mont autonomist gjeneric». Intindiment che al met in pratiche lis intenzions butadis li intun intervent sul nestri gjornâl di bande di Sandri Carrozzo, che di fat al è un dai doi puartevôs dal progjet, adun cun Luca Peresson.
I ponts di fonde dal program a partissin di ideis tant che la ricercje dal ben comun difondût cun justizie, la aministrazion no speculative des risorsis, la cooperazion, la incressite di maturitât e responsabilitât di dute la societât e la ricercje di moments di democrazie no delegade.
Par aprofondiments si pues lâ sul blog dal grup www.unfriuldiferent.blogspot.com, cirî su Facebook “Friuli Differente”, o scrivi une mail a unfriuldiferent@gmail.com.