Un mont dut furlan

France
E je dal 1820 la prime migrazion di piçui trops di mosaiciscj e teracîrs dal Friûl ocidentâl. In gjenerâl tal Votcent e tal principi dal Nûfcent la France e je soredut un teritori di passaç par lâ in Canadà, ma tancj furlans a decidin di fermâsi alì. Massime jenfri lis dôs vueris, tancj a son chei che a van in France esiliâts dal fassisim.
Svuizare
La Confederazion e devente tiere di fuarte emigrazion dopo de seconde vuere mondiâl, a scomençâ dal 1951. E je une des primis metis soredut de emigrazion feminine.
Belgjiche
Lis minieris a dan lavôr a tancj di lôr jenfri lis dôs vueris e subit dopo de seconde vuere a scomençâ dal 1947. Al è dal 2006 il documentari video «Farcadice, diari di viaç: Charleroi», di Carlo Della Vedova e Luca Peresson, dedicât ae emigrazion furlane tal centri minerari di Charleroi.
Lussemburc
Fornasârs ma soredut tancj muradôrs furlans a van a lavorâ in chest paîs e in Lorena, li dongje. I dissendents a mantegnin une comunitât fuarte, ancje cumò.
Gjermanie
Di simpri mete privilegjade, tant pe sô ricjece che pe vicinance cu la Italie. Adiriture di secui, cui viaçs dai Cramârs cjargnei. Tancj a son i puescj li che si son stabilîts i furlans. Di marcâ la presince di une fuarte comunitât in Baviere, soredut di fornasârs.
Romanie
Ae fin dal votcent e jere la Europe centrâl a clamâ dongje cui che al veve dibisugne di lavôr. La Romanie e jere siore e seneose di manovalance specializade. I imigrâts a vignivin des zonis – in chê volte austriachis – di Cividât, Cormons, Gurize ma ancje de Cjargne. La comunitât restade e manten la lenghe dai vons, i costums e cualchi plat tradizionâl.
Australie
La migrazion e tache planc a planc ae fin dal Votcent e e va indenant scjarse tai agns. Dopo de vuere dal ‘40 la situazion e gambie e i emigrants furlans a van a sdrumis tal gnûf continent. A ‘nd è ancje une presince gruesse di julians.
Sudafriche
Fuarte la comunitât furlane a Cape Town e Johannesburg. E je curiose la storie di chei di Tor di Zuin e di Sant Zorç che dal 1954 si son trasferîts te citadine di Umkomaas par fondâ une fabriche di celulose. Tal imprin a son rivâts in 254, pôc timp dopo il numar al è cressût a 350 stant che a àn puartât daûr ancje lis fameis.
Egjit
No esist plui une comunitât di furlans ma il fat curiôs al è che, vie pe metât dal votcent, e je stade une grande emigrazion di feminis che a lavin a siervî tes fameis sioris di là vie. A vignivin dal Friûl di zone austriache e a jerin preferidis par vie che a jerin plui studiadis (viôt la Patrie dal Friûl di Otubar dal 2006).
Argjentine e Uruguay
Lis primis partencis di colons furlans soredut pe Argjentine, ma ancje pal Uruguay, a son di fin votcent e a van indevant par scuasit un secul. Resistencia, Avellaneda, Colonia Caroja, Formosa a son lis coloniis principâls. Tal imprin i emigrants a son contadins ma dopo si zontin ancje muradôrs, imprenditôrs de edilizie, fornasârs che a van tes citâts di Cordoba, La Plata, Santa Fe, Buenos Aires e a Montevideo (Uruguay) li che al è inmò cualchi fogolâr furlan.
Brasîl
A Santa Maria e a Porto Alegre – cjâf lûc dal stât di Rio Grande – a vivaressin adiriture passe 3 milions di dissendents di emigrants furlans, 38 mil cuntun passepuart talian. Di chescj, almancul il 10% al vignarès de provincie di Udin. Dome jenfri il 1870 e il 1915 son emigrâts in Brasîl passe 200.000 personis. La citadine di Ivorà tal Rio Grande do Sul, e je clamade ancje Nova Udine.
Venezuele
Dopo de seconde vuere mondiâl e je stade une corse in Venezuele di furlans dal Friûl ocidentâl, massime di chei de Val Cose, de Val Midune e dal spilimberghês in gjenerâl.
Stâts Unîts
A partî dal 1880 a son soredut mosaiciscj e teracîrs i furlans che a sbarcjin a Ellis Island, la isule nomenade di Manhattan dulà che a vevin di restâ in cuarantene ducj i imigrâts che a rivavin de Europe. Tancj ancje i minadôrs. Cheste lavoranzie une vore specializade e je rivade a imponisi daurman par dute la Americhe orientâl.
Canadà
Al è tor dal 1870 che il Canadà al tache a clamâ lavoradôrs de Europe. Ancje se il viaç al jere plui curt di chel par lâ in Argjentine e Brasîl (10-12 dîs invezit di 25-30) no son tancj i furlans che a sielzin cheste destinazion. La situazion, però, e gambie tai prins agns dal Nûfcent e po dopo par dut il secul: a ondadis, a saran une sdrume chei che dal Friûl a sielzaran il Canadà par cirî une vite miôr. La comunitât canadese e je une des plui fuartis tal mont e ancje une des plui leadis ae Patrie. Tancj a son i «furlcanadians» e si dîs che la citât furlane plui grande e sarès… Toronto.
Dai emigrâts ai imigrâts: piçule storie dai fenomens migratoris dal Friûl
Tal secul XVI a jerin i “Cramârs” de Cjargne a scugnî lâ ator pe Europe a comerciâ, stant che i terens che si podevin lavorâ a jerin pôcs. La peraule Cramâr e derive dal tiermin todesc Kramer che al vûl dî marçâr (merciaio ambulante). Daûr di lôr si son sparniçâts, massime in Gjermanie, tiessidôrs, artesans, fachins e domestics.
LA RIVOLUZION INDUSTRIÂL_Te metât dal votcent il disvilup industriâl al gambie dute la situazion sociâl e economiche europeane e al fâs finî chest sisteme. Miârs di furlans a van in Argjentine e in Brasîl par cirî tiere, e vie pe fin dal secul altris miârs a van te Americhe dal Nord. Tal stes periodi lavoradôrs stagjonâi, ancje in grant numar, a van bande dai paîs de Europe centrâl dispès organizâts in grups di lavôr e impresis che a contribuiran al disvilup e al insiorament urbanistic e industriâl di chei lûcs.
DOPO LA VUERE DAL ‘15_Finide la prime vuere mondiâl a son la France, la Belgjiche e la Americhe a sostituî – ma dome in part – chel che a ufrivin i paîs de Europe centrâl. La instabilitât politiche europeane e une economie aromai ferme a sieraran simpri di plui la pussibilitât di cjatâ un lavôr tal forest ae fin dai agns vincj e tai agns trente. In timp di fassisim – duncje – la diaspore si ferme, e reste dome chê margjinâl dai dispatriâts politics e une emigrazion impuartante dentri de Italie, scjarse invezit chê pes coloniis.
IL SECONT DOPOVUERE_La seconde vuere mondiâl e lis sôs conseguencis a fasin lâ in piês ancjemò di plui il sisteme economic furlan e al torne a tacâ ad implen il fenomen de diaspore. La emigrazion no definitive e je di gnûf fuarte massime pai paîs europeans tant che France, Belgjiche pes minieris, il piçul Lussemburc, Svuizare e – tai agns Cincuante – la Gjermanie Federâl. Tal stes timp i furlans a emigrin ancje plui lontan e si clamin dongje, creant comunitâts, in Australie, Canadà e Sudafriche.
FIN DE DIASPORE_Ma daûr dal svilup talian di chei agns – e in gracie ancje dai bêçs che a mandavin in Patrie propit i emigrants – il fenomen al cale e la situazion e mude. A son obleâts a partî dome i furlans che a son a stâ in cualchi zone margjinâl. Tal 1967/68 il numar di chei che a tornin al è plui alt dal numar di chei che a partissin. E dal 1976, cu la ricostruzion dopo dal taramot e cu lis gnovis oportunitâts di lavôr, il fenomen al sparìs e anzit al è il Friûl che – cumò siôr – al clame lavoradôrs imigrâts dal forest.
Dree Venier