Sfuei Mensîl Furlan Indipendent
Archivi de Patrie

I emigrâts furlans in Istrie

Alessio Potocco

Il cognon plui difondût a Triest? Nancje di crodi: Furlan. In dì di vuê lu puartin 489 fameis. Cence contâ po i Furlanetto, i Furlani, i Furlanich. A pensâ ben, però, nuie di strani: par secui il popul furlan al à scugnût lâ fûr dai confins de Patrie par podê vê ce mangjâ. Cussì a Triest, cussì tes tieris dal Imperi di Austrie Ongjarie e in Gjermanie, cussì – tal Votcent e tal Nûfcent – tal rest de Europe (soredut France e Svuizare) ma ancje tes Americhis e in Australie. Une vore pôc si sa de migrazion furlane viers la Istrie, fenomen inmò pôc studiât ma che al à lassât cualchi olme ancjemò in dì di vuê. La Istrie (Istra sei par sloven che par cravuat), penisule di 3600 chilometris cuadrâts cumò spacade in trê tocs jenfri Cravuazie, Slovenie e Italie (comuns di Muje e Dolina), e je simpri stade tiere di passaçs e di invasions. Tal stes timp la Istrie e à scugnût patî une vore di epidemiis di peste e di altris malatiis che no davin pussibilitât di redenzie; a chest si zontavin lis vueris e lis carestiis. Daspò jessi stade par un periodi sot dal Patriarcjât di Aquilee, tal XIV secul la Istrie e jere dividude jenfri la Republiche di Vignesie e i Asburcs. Par fâ rivâ inte penisule gnove int daspò de “peste nere” dal 1348-49, il Senât di Vignesie al decidè di mandâ fûr un decret li che si sigurave la esenzion fiscâl par cinc agns par cui che, di li a un an, al fos vignût a vivi in Istrie. Chest decret dal 1376 al fo il prin tentatîf di organizâ la migrazion tes citâts e te campagne de penisule. Tentatîf lât ben: la popolazion e tornà a cressi, cundut che peste e malarie a continuarin a copâ une sdrume di int. Tal Cuatricent la situazion e le in miôr, soredut graziis al cumierç jenfri la Republiche di Vignesie e l’Imperi dai Asburcs; al fo in chei agns che diviers Furlans (soredut Cjargnei) a vignirin in Istrie. La lôr migrazion e fo spontanie, stabil, causade di resons economichis: une migrazion “mirade”, di int che e cirive di vivi miôr lassant i siei cjamps e i siei pascui. La migrazion e jere par solit definitive: di fat si trasferivin fameis interiis. Jenfri Cuatricent e Sîscent numarosis fameis cjargnelis a lerin a stâ in Istrie: tal Cinccent soredut tai paisuts de Istrie interne, in chê volte sot de dominazion dai Asburcs (mintri la Cjargne e jere sot Vignesie). Ma cui jerino chescj Furlans che a deciderin di trasferîsi in Istrie? In massime part, come dit, a jerin Cjargnei: si tratave di marcjadants ma soredut di artesans, o ben faris, marangons, scalpelins, tiessidôrs, sartôrs, muradôrs e vie indevant. Ancje orloiârs: tal 1809 un ciert Jacum Solari di Pisin al costruì un orloi pal comun di Isole/Izola (e intune letare si lamentà pal ritart tai paiaments!). Cualchi Cjargnel al pensà ben di lâ a torzeon a fâ il sunadôr, puartant cussì in Istrie cjançons, ritmis e melodiis di cjase. Chescj emigrâts (che la int dal puest e clamave par solit “Cargnelli”) a rivarin daurman a integrâsi cu la popolazion locâl, imparant la lenghe slave o il dialet venit dal puest; ancje par chest il furlan fevelât dai gnûfs rivâts al sparì in curt. No dome la fevele: stant a diviers documents, i Furlans si faserin valê ancje tal mistîr che za a fasevin te lôr tiere cun abilitât, e cualchidun di lôr al fasè ancje i bêçs, tant di cuistâ terens (cemût che al ven fûr di cualchi testament dai secui XVI e XVII). Secont Francesc Rota (1807), diviers emigrâts de zone di Sant Denêl a lerin in Istrie par lavorâ tes vîts.
La stesse cjosse la scrîf Zuan Meni Ceconi (1845), che però al zonte ai vignâi de Istrie chei des isulis de Dalmazie sot Vignesie, li che a lavoravin ancje emigrâts di Manià e dulintor. Stant a Zuan Tite Lupieri (1857), i artesans cjargnei a lerin in Istrie, mintri a metât Votcent a sielzevin Triest e la Gjermanie. Ce che al è restât inmò in dì di vuê a son invezit i cognons: Rovis, Gortan, Depiera, Misdaris. Par esempli, a Antignane (Tinjan in cravuat), paisut tal cûr de Istrie no lontan di Pisin, al è a stâ Enrico Depiera: i siei vons a rivarin tal Sîscent de frazion di Cjalgjarêt in comun di Comeglians. Il siôr Depiera al vîf inmò intune cjase in tipic stîl cjargnel, cun tant di fogolâr. La migrazion in Istrie de int furlane tal lâ dai secui al è un acjadiment di studiâ inmò miôr, par capî ad implen i leams che a jerin e che a son ancjemò jenfri il Friûl e la stesse Istrie.
Ve ca cualchi libri par savênt di plui su chest argoment
Gino di Caporiacco, Storia e statistica dell’emigrazione dal Friuli e dalla Carnia, dizioni del Friuli Nuovo, 1967 (doi volums); Gino di Caporiacco, L’emigrazione dalla Carnia e dal Friuli, Ed. Friuli nel mondo, 1983; Giorgio Ferigo, Alessio Fornasin (par cure di), Cramars. Atti del convegno Internazionale di studi Cramars. Emigrazione, mobilità, mestieri ambulanti dalla Carnia in Età Moderna. Tolmezzo, 8, 9 e 10 novembre 1996; Ed. Accademia di Scienze Lettere e Arti di Udine, Coordinamento dei Circoli Culturali della Carnia, Museo Carnico delle Arti Popolari “M. Gortani” di Tolmezzo, 1997; Furio Bianco, Domenico Molfetta, Cramârs: l’emigrazione della montagna carnica in età moderna (Secoli XVI-XIX), 1992; G.B. Pellegrini, L. Ciceri (par cure di), Trieste. 41° congresso della Società filologica friulana, Ed. Sff, 1964; Manlio Michelutti (par cure di), In Guart: anime e contrade della Pieve di Gorto. 71° Congres, 18 di setembar dal 1994, Ed. Sff, 1994.

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +