Un gnûf licôf pal Friûl

Al è almancul dal 1300 che i furlans a fasin “Licôf” ogni volte che a sierin il cantîr di une cjase, che a finissin un lavôr che ju à impegnâts e ur à domandât di investî bêçs e fâ fature. Ancje se si è stracs e si è vaît e sacramentat daûr di ce che si steve tirant su, ae fin no si pues no celebrâ la conclusion di un lavôr cence fâ fieste ducj insiemi: i parons cun ducj chei che a àn lavorât e chei che a àn progjetât, coordenât e colaudât ce che si steve fasint. Za che si è daûr a fâ fieste, si clamin i amîs e i vicins, e si cjale indaûr par visâsi di dulà che si è partîts, ringraciâ di jessi rivâts insom cence fâsi mâl e mostrâ che si è pronts a cjalâ indenant cun fiducie viers dal avignî.
◆ Cheste antighe usance nus mostre che pai furlans no je mai stade costruzion cence condivision: parcè che no tu fasis nuie di bessôl, ma tu âs simpri bisugne di chei altris. E no tu fasis nuie dome par te, parcè che ogni costruzion e slargje il benstâ e la ricjece de comunitât: une cjase e covente a une famee, e une famee e je vite, economie, disvilup pal borc, pal paîs e cussì indenant. Cheste e jere la filosofie dai nestris vons.
◆ Par chest mi somee biel, a nivel ideâl, che la Regjon, che e sta completant il recupar dal Cjistiel di Colorêt e vedi metude fûr, une volte rivade al cuviert, une frascje che pai muradôrs furlans di une volte e jere il segnâl convenzionâl che e jere ore di fâ licôf. Une peraule magari dismenteade di tancj ma che in chest câs e va tirade jù dal cjast e metude di gnûf in circolazion: parcè che al è il Friûl intîr a vê bisugne di un gnûf licôf. E no dome la scree dal Cjistiel, che ai 19 di Setembar e segnarà la restituzion di chest monument ae nestre int: e je bisugne di un moment coletîf par tornâ a ricognossisi comunitât, par capî che il nestri destin comun o vin di costruîlu insiemi, e cuntune vision che o scugnin pardabon condividi.
◆ Se cheste buine volontât e esist Colorêt al pues deventâ un simbul: il simbul di une rinassite coletive che si complete a 50 agns dal 1976. A son coventâts ducj par ricostruî un cjistiel che al è nassût tal Tresinte, propit la ete dulà che i furlans, stant ai documents, a àn scomençât a fâ il rît  dal licôf. La prime testemoneance e je dai cjamerârs (i aministradôrs) dal Comun di Udin che a ordenin la fusion di une cjampane gnove e a previodin une spese di vincj denârs ‘ad bibendum licoffium’. La etimologjie no je dal dut sigure, ma al ven sigûr dal todesc: e al derive forsit de union di dôs peraulis, “lit” (sgnape) e “kauf” (comprâ). E sarès la bevude fate cuanche si sierave un afâr, si finive une cjase, si copave purcits o si veve finît di vendemâ.
◆ No si podeve, tant che si dîs, “lassâsi come cjans”. E alore ancje nô, 50 agns dopo, o vin di mostrâ di vê imparade la lezion. E je ore che i furlans a tachin a cjatâ lis resons di dâsi dongje, e di progjetâ in maniere clare cuai che a son i valôr di fonde dal avignì di cheste tiere, lis robis di tignî di cont e chês che invezit si puedin lassâ colâ te dismentie. Intune ete di crisi demografiche, economiche, energjetiche e ambientâl o si torne a fâ su un gnûf Friûl o ce che al è stât ricostruît dopo dal 1976 al sarà stât fat su dibant. E i nestris muarts no nus daressin nissun perdon. ❚