✽✽ Disìnlu a clâr: nol esist intal mont une minorance etniche, linguistiche, che in sens storic no vedi esprimût un moviment politic che al rapresenti la sô difese, il dirit ae esistence e chel ae autodeterminazion.
✽✽ Chest sodalizi politic no simpri al è un partît e si pues presentâ intes formis plui diviersis, come ancje il so orientament ideologjic e il so pês eletorâl. A son però costantis che a definissin il so cuarp e la sô anime. Il prin al è chel di esprimi un teritori gjeografic precîs e definît, la anime invezit e je rapresentade dal amôr pe proprie tiere e pal so rûl intal contest des nazions. No plui duncje “improibidis” cemût che al veve definît Sergio Salvi intun libri che al à segnât il troi par tancj di nô, in chê volte zovins di bielis sperancis. E pûr il Friûl al reste ancjemò sospindût tra une veretât storiche e la mancjade realizazion dal sium autonomist. Il parcè al è sclarît in curt: la nassite di cheste Regjon di dôs musis al confin orientâl e il rûl nostalgjic e nazionalist rimetût a Triest a àn impedît un disvilup diviers. Clâr che no son mancjâts i tentatîfs, ancje resints, di ribaltâ chest stât di fats. Une sorte di separazion benevule e je simpri stade cjapade tant che esempli daûr dal model dal Trentin-Sudtirôl, ma nancje cheste soluzion istituzionâl e ven viodude aromai tant che pussibile e la gjaline regjonâl, buride fûr di une sacume illyane orende, a imitazion de nobile acuile patriarcjâl, e svintule sul imbarcjadôr San Carli, par talian “molo Audace”.
✽✽ Un “Triest über alles” tal non dai interès siei, dal Stât e ancje des multinazionâls. Cheste e pâr che e sedi la peraule di ordin de classe dirigjente regjonâl, secondade di une concezion che e viôt il Friûl limitât dome a espression gjeografiche. Scusait. Nancje plui chê, viodûts i atacs simpri plui fis ae sô stesse esistence fisiche e gjeopolitiche.
✽✽ Si puedial sperâ intun cambiament? O crôt propit di no. Che e guvierni il centridrete o il centriçampe, la unitât regjonâl e rimbombarà simpri tant che un mantra che no si pues tocjâ. Se duncje nol è pussibil sperâ in ats concrets, in politichis di realizazion des dibisugnis e des sperancis de nestre int, o vin di declarâ la secession. Une secession ideâl che e devente critiche cuotidiane a un mût di intindi la robe publiche, i rapuarts umans e sociâls. No plui cidins e simpri favorevui, ma furlans libars di pensâ al avignî cul nestri cjâf e lis nestris mans. ❚
