«O soi nassût a Codroip, il cognon nol è furlan parcè che gno pari si cjatave li… induvine? Sì, a fâ il militâr» al rît Albert Capozzella, cognossût tant che “Lester”, il famôs dj di R101. «Un classic: de gjenerazion sore i cuarante, ducj chei che o incuintri a Milan che a cognossin il Friûl al è parcè che a àn fat il militâr li», al marche.
◆ «E ducj, o dîs ducj, a ’nt fevelin benon: si son cjatâts ben tant che mangjâ, bevi e soredut cu la int! Altri che la liende che o saressin sierâts» al dîs braurôs. Sì, parcè che Albert, cundut che il cognon nol sedi “tant furlan”, si sint strafurlan (la mari, dut câs, lu è) e dilunc di dute la interviste al torne dispès il «nô furlans» o un «o varessin di fâ cussì» e il «no si rindìn cont dai tesaurs che o vin».
◆ Dal rest, la sô vite e je dute in Friûl, de nassite – come che si diseve – al trasferiment di piçul intal paisut di Bagnarole in comun di Siest, dulà che dopo al à vivût, ma ancje ae sô vite di cumò. «Fin dal principi, di Milan ogni fin di setemane o torni a Bagnarole. O soi une specie di pendolâr, no un milanês di adozion. La residence le ai di simpri in Friûl, par esempli».
◆ I principis tant che dj a son però in Venit, chel “furlan”: «O ai scomençât intune piçule radio di Puart, Lt2. Li che “L” al stave par Livence e “T” par Tiliment»; po dopo, jessint lât a studiâ a Vignesie, al jentre in Prima Rete e dopo inmò al passe a chê che e jere la potente Radio Padova.
◆ Di li, al fâs il salt a Radio Montecarlo, par finî a R101, che e fâs part dal stes grup, a indalegrâ lis matinis dai radio scoltadôrs intune cul so amì Paolo Dini.
◆ I domandi cuâi che a son i siei lûcs furlans in citât. «No ’nd ai tancj, no ju ai cirûts, stant che, cemût che ti disevi, in Friûl o soi simpri. Di agns o cognòs Gunnar Cautero, che al à la ostarie furlane, li che o ai cjatât simpri une grande ricercje sui prodots furlans. O cognòs miôr il Friûl… in Friûl!» al rît. E al è propit vêr: un dai motîfs al è che Alberto al è un motâr, e duncje il Friûl lu à zirât fûr par fûr. Di fat, vie pe interviste mi à dât cualchi drete che no cognossevi su prodots locâi. Ma e reste fra furlans a Milan (o pendolârs). ❚
Dree Venier
