Elvio Pompei 53 agns, nassût a Perteade (Pontebe), di 20 agns al puarte indevant une vision uniche tal cjamp de mode. Il sô negozi di vistiari Coolness (coolnessmilano.com) al à fat 20 agns tal 2018, cuant che al à screât un gnove sede, un elegant “Club Store” in zone Sant Ambrôs.
La sô imprese al è il risultât di dôs passions, la mode e il balon. Tifôs dal Udin, clâr «ancje se cumò no voi tant in trasfierte come une volte», al à impuartât par prin in Italie chê mode casual nassude ator dai stadis di Ingletiere deventant un dai siei riferiments a nivel european. Elvio, di fat, al fâs ancje il distributôr di brand. «E je stade une evoluzion naturâl, sedi pe storie de buteghe che pe passion personâl viers di un ciert gjenar di lifestyle».
Par spiegâ chest stîl al à lançât l’hashtag #gentlehooligan, che «Al è un zûc di peraulis» mi spieghe «Al vûl dî sintîsi apropriât a dutis lis situazions, dal stadi ae ocasion elegante. Il Gentlehooligan al met la sô personalitât in dutis lis situazions».
Fasint un belanç dai siei 20 agns di ativitât mi dîs che «I vin simpri dât une impostazion ben precise al lavôr, cualchi volte ancje falant. Al è falât jessi in intart ma ancje jessi masse in anticip. O vin impuartât brand par prins in Italie che la grande distribuzion e à disfrutât in mût massificât, intant che nô, cun paronance ecessive, ju abandonavin par cirî alc di gnûf.» Al pues sucedi, massime cuant che e je la passion che ti comande: «O vin cirût di tirâ sù il gust, plui che cjavalgjâ la onde. Di un pont di viste comerciâl, al è stât un erôr ma la mê brame e je di proponi simpri il gnûf».
La idee si tradûs in une filosofie di negozi che si pues viodi lant a cjatâlu, al Coolness di vie Lanzone 33: Elvio nol si contente di mostrâti un articul di vistiari, ma intant che tal fâs viodi ti conte la storie che e je daûr «O sin une sorte di club. O costruìn il stîl su la personalitât dal client. Vuê i zovins a vuelin vistîsi cemût che al dîs l’influencer di turni, ma a chel che al ven chi di nô o volìn fâi esprimi il propri stîl».
Un english style cun concretece furlane, duncje «Si pues dî, sì» mi fâs «e fuarce Udin! Simpri!» ❚
