“Un can di Trieste” paron de sede RAI

Ti ven voie di ridi a sintî lis nainis de radio regjonâl par ricuardâ il licôf de sô sede triestine tal 1964. Par une setemane i condutôrs no àn fat altri che fâsi spieli de lôr bravure, ma soredut dai programs di une volte. E cussì si passave dal puar Luttazzi, che a son un pâr di agns che al è muart, a Luttazzi, e po dopo ancjemò Luttazzi cun une spolvarade dal mestri Ceccarin, ancjemò vîf, e Antonella Reggi, in plene forme, beade femine. E cussì, tra lis notis di “Un can de Trieste” e “Il tram di Opcina”, o vin scuviert che dome lôr a son brâfs, che dome lôr a san fâ culture e che la storie si ferme pardabon cuasi simpri a Parenzo e cuant che e va plui indenant e fevele di dispatriâts e di julians dalmatis.
E alore ti monte sù la fote, cuant che dopo a fevelin di informazion pes minorancis e si fasin bulos propit di chest par domandâ di no sierâ la sede regjonâl. O crôt che si vedi di dî vonde doprâ la cuistion de lenghe furlane dome cuant che ur comude: i numars des oris di trasmission in marilenghe a son la dimostrazion des lôr bausiis. Ma no je dome une cuistion di lenghe: par talian, tropis sono lis trasmissions su la nestre storie? A Triest si contin ancje i pêi tal cûl dal ultin velist de Barcolane, par Udin, Gurize e Pordenon se nol mûr cualchidun, lis gnovis a rivin cul gucjarin. E, a proposit di sede: dait une man di blanc a chê di Udin che e cole a tocs. Ma forsit al è il presit di paiâ pal Udin in serie A. Dificil di parà jù par chei de alabarde. ❚
L’om di Buri