Sfuei Mensîl Furlan Indipendent
Archivi de Patrie

UN BLANC E UN NERI. 7e pontade. Alì dai voi… verts

............


I sin tal sotpàs dongje de stazion, jo e Alì Shinà (il non al è inventât, il rest a son veretâts), a scovâ il passaç che al mene alì da vecje manifature. “Shinà”, al è un sorenon pashtu, parcè che al à i voi verts, e lavorant mi domande ce che o fasarai cuant che o varai finît di lavorâ cun lôr. I dîs che o ai lavôrs di storic di finî e che o tornarai jù a Triest. Lui mi cjale stranît, e mi domande di gno pari. “Gno pari ce?”. Mi domande se ancje gno pari al vignarà a Triest. I rispuint di no, che ancje se al è vedul al à i siei zîrs, la cjace, i siei lavoruts, un gnove femine. Nol esist che al vegni a stâ a Triest e al restarà a cjase sô, alì in Gôt. Alì Shinà nol è convint. Lu viôt pinsirôs e ancje jo o pensi a gno pari bessôl, in chê grande cjase dulà che o stavin in cinc e un doman al tornarà a stâ bessôl dute la setemane.
Dopo un bon moment, Alì Shinà al torne dongje.
«Puedio domandâti un robe?» al fâs.
«Sigûr» i rispuint.
Alì si poie tal mani dal ristiel e si svicine, tacant a contâ cu la ande di cuant che si conte un robe biele. «A cjase mê, a Peshawar, in taule o sin simpri almancul in 27»
Si poie il ristiel su la spale e cul lis mans libaris al tache a contâ sui dêts. «A son i vons, i miei gjenitôrs, i miei fradis cu lis lôr feminis e fruts, lis sûrs no ancjemò maridadis. O mangjìn ducj insiemi, e al è râr che no si fermi a mangjâ cun nô cualchi amì o cusin di passaç».
A chest pont, si ferme e mi cjale.
«Parcè voaltris mangjaiso simpri in doi, trê, o cuatri? O Ancje di bessôi?»
Jo o riduci e o cjapi timp.
O pensi ai pastons di Nadâl, cun dîs o dodis parincj, e bielzà cussì mi cjape un atac di panic misantropic e di claustrofobie. Figurâsi se al fos ogni dì.
«Alì, viodistu?», o tachi a contâ dopo un moment «sedi jo che mê sûr o stavin ben in famee. I miei a son buine int e nus àn simpri lassât libars di fâ e lâ. Però ducj i doi, a pene laureâts, o vin cjapât il prin lavôr che al capitave e o sin lâts vie di cjase. Jo o soi lât a fâ manutenzions in fabriche, e daspò in linie dibot doi agns, pûr di lâ vie di cjase».
«Tô sûr e je lade vie cence maridâsi?! Ma se o levis dacuardi, parcè lâ vie?»
«Parcè che jo o vuei ben a gno pari, e o ai rispiet di lui, ma nol è il gno paron. Âstu capît?»
No, nol sta capint. Come cuant che i ai dit che la grande cjase blancje cui arcs, dongje de fontane di Silans, no je cjase mê ma e je cjase di gno pari.
E je dure di mandâ jù par Alì Shinà, la nestre idee di libertât. Dure di mandâ jù la nestre libertât de famee, par un che al è lontan sîs mil chilometris e cuatri vueris di cjase, e che la uniche libertât che al volarès vê e je chê di podê stâ a mangjâ cun lôr, ducj i 27 vons, gjenitôrs, fradis, sûrs e nevôts, plui cualchi ospit che al passe par câs. Dure di mandâ jù la nestre libertât individuâl, la nestre libertât di sei di bessôi.
Mi domandi chestis robis, intant che o lavori, e o lavorìn cence cjacarâ, jo e Alì, ognidun pinsirôs cui siei pinsîrs. Dopo un pôc, lu sint che al clame a cjase, salacor sô mari, e lu viôt ridi come un frut. Jo o pensi a gno pari che al è di bessôl, cence plui la femine e i fruts. Cuissà dulà che al è, ce che al fâs. O cjapi il sveltofon e lu clami.
«Dimi» al sunsure ben planc.
«Mandi papà»
«O soi a cjace, o spieti la parade. Dimi svelt» al fâs, atent a no fâsi sintî.
Eh, juste, ce pote che o soi! Vuê al è miercus. Il miercus al va a cjace cu la scuadre.
PS. Il personaç di Alì al è fat cun blecs di veretâts cusidis in maniere libare. Lis sôs peraulis a son stadis ditis pardabon.
✒ Igor Londero

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +