Il “diari dal front” di un “studiât” che al si cjate a fâ il scovacin e il puint tra il Friûl e i forescj che domandin asîl rivâts tal so borc, ven a stai come tutor dai «lavôrs volontaris» dal Comun di Glemone. Un mût par contâ il Friûl di vuê a partî dal confront cun marzians di cui si sa pôc e nuie, cun cui bisugne cjacarâ franc e sempliç, lassantsi meti in crisi di domandis che dispès nus costrenzin a cjalâsi dentri.
Airottart icima ilga. Cui di piçul no aial vût il so Abacadabra, la sô Scjaraçule maraçule par fâ cualchi magjie o cjatâ la robe juste te cjalce? Jo o vevi cheste formule (airottart icima ilga) par parâ vie la pôre. E crodêtmi: e funzione.Dopo dal taramot, e fintremai tai agns Otante, il borc di Gôt, e dute Glemone, nol veve lampions. Mê mari, dopo cene, e fruçave il pachet vueit di MS e e cjalave me e mê sûr plui grande, che però e disparecjave.
«Vami là jù di Jeur a cjoli i zigarets» mi diseve.
«Mame, o ai pôre»
«Se tu âs pôre, sivile fuart».
Mê mari no jere triste. E jere strache di vore. Il vecjo Despar che o vevin a fit al jere colât cul taramot, ma al jere restât sù il magazen e alì dentri e jere rivade a tornâ a vierzi la buteghe pôcs dîs dopo dai 6 di Mai. Al jere l’unic alimentâr viert a Glemone, e par chest e à vût ancje un premi. Sierade la buteghe, e veve l’ort, lis bestiis, me nassût un an e une dì prin dal taramot, mê sûr e i vecjos di viodi. E po, in chei agns al jere cussì, cui fruts. O cussì, o “cjale par Buie”. Jeur nol jere lontan. Une corse di mieç minût, nancje. Però al jere da pît di un prât, cu la jerbe alte plui di me di ca e di là dal troi. E soredut al jere scûr tant che in bocje. E jere la lûs de lune, se e lave ben, se no dome chê scrite su dôs riis, mieze rosse e mieze verde.
AIROTTART
ICIMA ILGA
Che po e jere la insegne, che di cjase mê si leieve par daûr, poiade sul tet di Jeur, ostarie e tabachin dal borc.
In chê volte, Gôt al veve trê ostariis e une latarie (chest lu ai bielzà contât) e invezit cumò al è dut sierât. Ancje la buteghe no je plui, scjafoiade dai superiperultra maladets marcjâts vierts dilunc la Tresemane. Par mangjâ alì di Jeur, cuant che e cusinave Rosine “chê di Jeur”, a rivavin corieris plenis di Mucs e a parcavin tal plaçâl denant, dulà che i Nomadi, grancj amîs dal borc, a àn sunât a Glemone pe prime volte dopo il taramot. Augusto mi veve fat l’autograf. Purtrop lu ai pierdût, e mi mangji ancjemò i dêts, ma mi impensi che al scriveve il so non fasint ancje un autoritrat, cu la barbe e i ocjaluts. Cualchi setemane fa, gno pari, par fâi un plasê a Rosine, al è lât sul tet di Jeur e al à tirât jù la scrite. Cuant che la sere o soi rivât a cjase e o ai viodût che no jere plui, mi sei sintût a mancjâ. No tal sens di pierdi i sens, ma tal sens di mancjâ alc. Alc che te gnot mi veve dât coraç. Alc che al è simpri stât alì di cuant che mi impensi. Però, la ostarie e je sierade, mi à spiegât. Lis letaris dopo tancj agns a stavin colant e soredut Rosine e veve di paiâi tassis parsore e mighe a podevin lassâlis alì par me. “Se tu âs pôre, sivile fuart”.
Cumò alì di Jeur al è plen di forescj. Pakistans e Afghans, e no stait a domandâmi parcè che a son vignûts ca. Par chest cjalait su Facebook, che al è plen di int che e sa dut e us spieghe. Jo invezit no lu sai. O sai che in Gôt e je un fontane, chê di Silans, cu la aghe plui buine dal mont e ducj, fin de gnot dai timps, a son passâts par ca a bevi un got. Nô che o sin nassûts culì, o sin benedets dal diu des sorzints. Invezit, cualchidun al à scugnût vignî di un grum lontan, ma tant aghe a ‘nd è par ducj. Tal borc cualchidun al à dit che al à pôre di chescj forescj. Jo o ai pensât “Se tu âs pôre, sivile fuart” e o soi lât ju, a cjacarâ cun lôr. Tancj altris a àn fat compagn. Insome cumò o lavori cun lôr, chei che a àn fat domande di asîl. Ur stoi daûr tai lavôrs volontaris. E il rest us al contarai. ❚
✒ Igor Londero
