«Udin e conte»: gnovis in marilenghe dal Comun di Udin

Udin e conte al è il prin progjet multimediâl par furlan di une aministrazion publiche: nol è dome un notiziari pe television, ma al fâs part di un progjet plui grant che ‘nt cjape dentri ancje un pe radio e il periodic bilengâl Ud.info.
Il progjet al nas de idee di Walter Tomada, l’assegnât ae stampe dal Comun, e al è finanziâts cui fonts de L. 482/99 pe tutele des minorancis linguistichis e storichis. Il program al è scomençât tal 2005 cun pontadis di 5 minûts. “O vin sielt di pueste di fâ pontadis curtis, propit par che il risultât al sei svelt e moderni” al dîs Walter Tomada “par chest si è decidût di dâ a Giorgio Cantoni la regjie. Udin e conte al è un lavôr di scuadre: jo mi ocupi di redazion dai tescj, Giorgio de part tecniche e Lisa Zancaner e je la seconde vôs”. Dal 2006 la durade des pontadis, sedi radio che tv, e je cressude fin a 10 minûts. Ogni setemane la trasmission e inzorne su lis iniziativis che a integnin il Comun di Udin, su dut ce che al rivuarde la lenghe e la culture furlanis, e su lis manifestazions di chenti. La redazion e promôf ancje lis gnovis che no jessin in chei altris gjornâi. Udin e conte si lu pues viodi su Telefriuli in cuatri dîs difarents: la sabide aes 19.30 e, in repliche, la domenie vie pe Istât aes 23.00, vie pal Invier invezit dopo de partide di balon, po dopo il lunis e il martars aes 21.00. Cun di plui si lu pues scoltâ su Radio Onde Furlane (la sabide aes 12.30 e il lunis aes 21.50) e su Radio Spazio 103 (la sabide aes 12.30, il lunis aes 10.50 e il miercus aes 18.20).