TV furlane. Contile Juste, il tg de Provincie di Udin in lenghe furlane in onde su Telefriuli fin a Dicembar

E je za tacade di un pôc la gnove stagjon par Contile Juste, il notiziari setemanâl de Provincie di Udin in lenghe furlane. Il program al è un classic de comunicazion par furlan, aromai. Une ocasion di no pierdi par cui che al vûl scoltâ notiziis in marilenghe. Il program al è in onde su la emitente locâl Telefriuli ogni vinars aes 19.45, cun repliche te sabide inte stesse fasse orarie, e al larà indevant fin a Dicembar. L’aprofondiment al è acessibil ancje intal portâl web dal Ent (www.provincia.udine.it).
Realizât de aministrazion provinciâl, Contile juste al propon notiziis, servizis e aprofondiments su la realtât de Patrie dal Friûl, in cont di economie, lavôr, turisim, ambient, tradizions e timp libar.
Se a cualchidun i restàs ancjemò il dubi che par furlan no si pues frontâ ogni argoment, baste viodilu par cerçâ trop che, invezit, l’ûs de marilenghe i da aes “gnovis” ancje un savôr di plui.
Pal President de Provincie di Udin Pietro Fontanini «l’obietîf al è chel di valorizâ lis tantis ricjecis dal Friûl, no dome chês ambientâls, ma ancje storichis, culturâls, economichis. In chest spazi o larìn indevant a dâi vôs al teritori cirint tal stes timp di promovi e difondi la lenghe e la culture furlanis». ❚
✒ Redazion