Il Consorzi produtôrs vueli evo F-VJ
al invie il gnûf sfrantoi a Martignà
Al è stât screât di pôc, inte zone industriâl di Martignà, il gnûf sfrantoi dal Consorzi produtôrs di vueli extra vergjin di ulive dal Friûl-VJ. Nassût intal Jugn dal 2022, al Consorzi a àn aderît fin cumò 15 micro e piçulis impresis regjonâls agriculis, ma lis adesions a son ancjemò viertis. La gnove struture e je un centri di trasformazion Mori-TEM – tra il plui inovatîfs e avanzâts dal pont di viste tecnologjic tra chei disponibii vuê in Italie – che il so cûr al è il sisteme Cultivar 1.000 dotât di trê maçuelis verticâls di 500 kg ognidune, e di un decanter DMT 12, in stât di lavorâ 10-12 q/h di ulivis. Il sisteme di trasformazion a dôs fasis al è gjestît di un sisteme hardware e software in Industrie 4.0.
◆ «La costituzion dal Consorzi e jere un pas obleât pe presentazion di un progjet di filiere sostignût ancje de realizazion di un sfrantoi – al declare il president Bruno della Vedova (te foto) –. La Associazion dai produtôrs di vueli extravergjin di ulive de zone culinâr furlane (ASPROEVO), che cumò e conte une cuarantine di microprodutôrs, e veve evidenziât la dibisugne di un sfrantoi par poiâ il disvilup continui de uliviculture in regjon. La disponibilitât di piçui sfrantois sparniçâts sul teritori – e dîs – no baste pe produzion di cumò, ma soredut par dâ une prospetive di disvilup al setôr. Il machinari sielt al è in stât di sigurâ la ecelence de produzion, acompagnât des cognossincis dal operadôr di sfrantoi che o stin formant. Cumò lis plantis dai socis a son 5.300. Pe prossime stagjon di turclade, se o rivarìn a catalizâ il 20-25% de produzion, cuntune rese dal 12% si podarès rivâ a 180-240 cuintâi di vueli. In tiermins cuantitatîfs, l’obietîf dal Consorzi al è chel des 10 mil plantis sparniçadis in 25-30 etars di teren».
Un tornâ di sucès
Il tornâ de culture dal ulîf in regjon, dopo agns di declin par vie de glaçade disastrose dal 1929, al è stât pussibil midiant di un progjet pionieristic inviât dal Ersa une ventine di agns indaûr, su indicazion e convinzion di chel che al jere il so diretôr, Sandro Baldo. Cumò, l’ulîf al è coltivât su 358 etars, in dutis 4 lis provinciis de regjon. Lis ulivis racueltis a àn passât lis 1.000 toneladis, par une produzion di vueli evo di 136 toneladis. La regjistrazion pe Dop dal evo “Tergeste” e je datade 2004.
◆ Il sfrantoi consortîl, che al sarà operatîf pe prossime racuelte ulivicule, di là di incressi la capacitât di trasformazion dal teritori, al sarà disponibil ancje par tierçs e al permetarà di aumentâ e di miorâ la capacitât di confezionament dal vueli evo, aspiet fondamentâl pai produtôrs che a àn la esigjence di comercializâ il lôr prodot. Il gnûf sfrantoi al permetarà di dâ completece ae filiere produtive sul teritori regjonâl: turclade, imagazenament, filtrament, imbutiliament, etichetadure e, in câs, comercializazion, a podaran jessi fatis intun unic centri, che al podarà deventâ un riferiment su scjale regjonâl e rapresentâ un travuart impuartant pal compart. «Procedint in chest mût – al sclarìs Della Vedova – al sarà pussibil promovi il disvilup e la razionalizazion de produzion di ulivis su diviers terens, inte otiche di furnî une alternative culturâl e economiche aes aziendis agriculis de nestre regjon».
Une cualitât impressindibile, che e cjale bande l’Igp
Il Consorzi produtôrs vueli evo F-VJ, cun di plui, si da altris obietîfs. E je volontât dai socis, di fat, promovi e realizâ la trasformazion de materie prime midiant di un sfrantoi moderni, di mût che la produzion dal vueli locâl evo si colochi intune fasse alte par cualitât, viodût il presi des ulivis che a vegnin produsudis e racueltis sul teritori, a cjaval dal 46st paralêl terestri. E vignarà destinade une atenzion particolâr sedi ae produzion che ae racuelte e conferiment di materie prime di cualitât alte e grât di maturazion coret. Cu la stesse cure, la lavorazion in sfrantoi e larà daûr di protocoi cetant rigorôs pe pulizie, lavadure e suiadure des ulivis, prime de turclade, gramoladure e separazion dal vueli. «Cun chestis precauzions o sarìn in stât di produsi un vueli evo di alte cualitât, frescjece e carateristichis organoletichis – al anticipe Della Vedova –. I profums e i aromis a dipendaran invezit de varietât e cualitât des ulivis, timp di racuelte e modalitât di lavorazion».
◆ Il sfrantoi di gnove gjenerazion dal Consorzi al permetarà ancje di inviâ un procès di economie circolâr: in graciis dal implant inovatîf al sarà pussibil recuperâ il sotprodot (“sansa”) che al vignarà doprât dopo pe produzion di biogàs, intant che il nusel al sarà separât tant che biomasse combustibile.
◆ Al è dopo un altri aspiet che dispès nol pues jessi frontât di piçulis aziendis produtoris e che par chês il Consorzi si met tant che aiût, o ben chel de promozion e comercializazion dal vueli, ancje in cumbinazion cun altris prodots di cualitât dal “Made in F-VJ”. «Un altri obietîf che si da il Consorzi – al zonte Della Vedova – impuartant pe identitât, pe cualitât e pe segnabilitât dal prodot, al è chel di domandâ, dentri di un pâr di agns, la tutele europeane de Igp (Indicazion Gjeografiche Protete) pal nestri vueli».
◆ Il Consorzi, sostignût de Regjon e acompagnât intal so disvilup di PrimaCassa F-VG, si presente tant che strument di agregazion e di cressite pal setôr regjonâl ancje in graciis di une sielte fate dai siei fondadôrs: la fruizion dal sfrantoi no sarà dome pai socis conferidôrs dal Consorzi, ma ancje pai produtôrs no socis. I conferidôrs a podaran decidi di ritirâ il vueli che al derive des propriis ulivis o a podaran cedi lis ulivis o il vueli al Consorzi che si interessarà po dopo di turclâlis, di imbutiliâ e di comerciâ. Ancje il servizi di etichetadure al sarà viert a ducj i produtôrs.
◆ «La nestre volontât – al siere Della Vedova – e je chê di dâi merit ae unicitât de nestre tiere, cuntun vueli di nicje di cualitât alte che al rifleti lis sôs carateristichis esclusivis».
Par eventuâls informazions e aprofondiments, il Consorzi al à ativât il sît: www.oliofvg.it ❚
