Provait a lâ a Lignan, di istât o di unvier nol cambie tant, cjalaitsi ator: tal centri, su la splaze, tai ambients. Isal alc che us fâ dî cun sigurece di jessi in Friûl? Probabilmentri no, parcè che di furlan Lignan al à pôc (come pôcs a son restâts i furlans residents). Nissun cartel che al fevele di Friûl, nissune buteghe tipiche cun Montasio o cul crût di Sant Denêl, nissun negozi cui curtis di Manià o cu lis cjadreis di Manzan.
PRODOTS TIPICS_Dacuardi e nas tant che localitât turistiche «internazionâl», ma stant che plui dal 40 par cent dai turiscj che a rivin in Friûl si fermin a Lignan (plui di 3 milions e 400 mil lis presincis tal 2006, a disin de Agjenzie Turisim Fvg, l’ent leât ae Regjon che al promôf il sisteme turistic di chenti), inalore pensâ di veicolâ di li la imagjine di un teritori intîr, la sô storie e culture, i siei tesaurs artistics e enogastronomics, no sarès sbaliade. No sin dai codârs. O savìn ben che la Turisim Fvg e sta lavorant in cheste direzion, ma in ce maniere? Intant – nus sclarissin i siei operadôrs – potenziant i servizis informatîfs: ai doi «info point» di Lignan e Pinede si son zontâts chei mobii, a rotazion, tes «hall» dai albiercs, e chel ae Beach Arene vie pe sere, plui opuscui inzornâts regolarmentri. Po presentant i prodots tipics dal teritori in ocasion di manifestazions te citât, tant che il Festival dai vins dal Friûl Vignesie Julie dai 15 ai 17 di Jugn (une des pocjis iniziativis che si lein diretementri ae regjon). E cu la «Friuli card» a rivaran des gnovis te ufierte dai servizis. In sumis se il turist al à voie di savê ce che al è fûr di Lignan o al va tal pont informatîf o al sta intun dai otei dulà che si fâs promozion dal teritori
o al à di lâ a bevi un tai di blanc.
ALC ISAL ALC?_Miôr di nuie, ma «nol è che l’”info point” al à di spietâ che la int e ledi a domandâ robis, po migo ducj a van li. E covente une azion informative plui eficace», al dîs Ciro Chialchia, candidât sindic di Lignan pal Moviment Friûl aes elezions aministrativis di Mai. «La promozion no si fâs dome metint opuscui tai albiercs. I otei no podaressino proponi dai pachets turistics cu la pussibilitât di lâ ator pal Friûl?». Ce sens aial tignî strents i turiscj, magari intune zornade di ploie, soredut cumò che lis vacancis a son simpri plui curtis? Lis propuestis di escursions di Lignan po no mancjin: in motonâf a Grau e te lagune o ben sul flum Stele cun visite ae oasi dal Wwf e soste tai casons dai pescjadôrs a Maran, ma ancje sul flum Tiliment o, in coriere, tes cantinis de regjon. Ancje cui che al à la passion de biciclete nol restarà deludût. «Ma cui lis cognossie chestis propuestis – al domande Chialchia –? A son pôc publicizadis». Dacuardi cun lui ancje Gian Carlo Ridolfo, titolâr cu la mari, de buteghe di mangjative omonime di Lignan, dulà che al è nassût, che e ten prodots tipics furlans: dal formadi di malghe ae scuete fumade, al pressut crût di Sant Denêl, oltri a proponi 200 etichetis di vins de regjon su 400 che ’nt vent. Un dai pôcs de citât. Nissune maravee: «Tal cumierç e je plui int di fûr che di ca – al marche Ridolfo –, trê cuarts dai operadôrs no son furlans». Dificil, duncje, spietâsi di cjatâ negoziuts tipics.
NUIE DI FURLAN_Ce isal alore di furlan a Lignan? i domandin a Ridolfo. «Jo no ricuardi nuie di furlan», al rispuint. «La sere te strade centrâl si viôt cualchi zovin che al sune la ghitare, cualchi cinês che al scrîf i nons cui colôrs – al conte –, ma se al fos il vecjut che al fâs la polente cul baston o la scuete fumade di Denemonç, dal sigûr che i turiscj si ricuardaressin dal Friûl!» Duncje, di sistemis par fâ cognossi la regjon cu lis sôs tipicitâts ’nt saressin. Tant che «manifestazions di fâ cun continuitât, une, dôs voltis la setemane, in puescj strategjics de citât, ancje fûr stagjon, clamant aziendis di dut il Friûl», al propon Arnaldo Anastasia, titolâr di trente agns dal ristorant «Al bancut», une moscje blancje cul so menù furlan – une vore preseât dai turiscj – tra lis tantis tratoriis e pizariis gjeneralistis de localitât di mâr.
RECUPERÂ LA IDENTITÂT_«Cumò a son rivâts ancje i turcs cul kebab. Bielzà al è dut un miscliçot. Achì no je plui une identitât furlane». Ma «bisugne recuperâle – al sburte Chialchia –, ancje parcè che Lignan cumò no à grandis pussibilitâts di svilup se no si lee a dut ce che al è sul teritori dal Friûl, ae sô culture e aes sôs tradizions.
Se e reste isolade cussì come che e je, ni cjar ni pes, no larà indenant. Stant che achì e rive un grum di int dal forest e di dute Italie, di Lignan a varessin di partî percors viers il Friûl, cun ricjadudis concretis par dut il teritori». In sumis, «la int no pues vignî achì dome par svuacarâ te aghe». Ce fâ alore? «E varès di intervignî cun plui fuarce la Regjon, ma ancje i privâts a àn di fâ la lôr part».
E no dome i furlans.
Sindic jo mame / “La nestre int no à mai molât. Covente fâ, no lamentâsi, par saltâ fûr dal pantan”
Walter Tomada
Alessandro Marangoni: la Aclif e deventarà istituzion di riferiment pai furlans “La Assemblee dai sindics furlans e je une realtât necessarie. E cul timp e deventarà ancjemò di plui un pont di riferiment pe identitât de nestre int”. Al è sigûr di chest Alessandro Marangoni, prin citadin di Dartigne, che al crôt tant inte Aclif […] lei di plui +
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
Ricorence / Pier Pauli Pasolini om contraditori e segnâl di contradizion
Pre Toni Beline
Tal centenari de muart di Pier Pauli Pasolini o ripuartìn a tocs la tierce part dal libri scrit di Antoni Beline tal 1993 ‘Trilogjie tormentade’, che e rivuarde propit il poete di Cjasarse I. RISPIETÂ IL MISTERI DAL OMLa sience plui dificile e je la cognossince di se stes. E se al è grivi cognossi […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +