Laureât in filosofie, ex ostîr, scritôr e divulgadôr tal cjamp enologjic. Matteo Bellotto al à fat e al fâs tantis robis diviersis ma une lis met adun: l’amôr pal Friûl. Di pôc al è jessût il so prin romanç e al à vût il premi Isi Benini (une sorte di Oscar in cjamp enologjic), ma nus conte ancje di chel che al è sucedût prime
Matteo Bellotto, classe 1980, di Glemone, al è un personaç che al à savût meti adun variis esperiencis che al à fat te vite par fâsi une cariere dute particolâr. Di mistîr al è consulent e divulgadôr tal cjamp enologjic. Dongje a chest “contâ il vin” al à metût ancje la capacitât di contâ la vite.
_
Matteo, ce studis âstu fat?
O ai studiât tal liceu sientific «Magrini Marchetti» di Glemone e dopo mi soi laureât in filosofie a Padue.
_
La filosofie e somee une materie pôc concrete rispiet al lûc comun dai furlans, che si conte che a sedin un popul plui pratic. Ce ti àno dit in famee?
In famee no mi àn judât, ma plui secondât: «se tu sês convint, fasilu, ma “rangjiti”». Par me chest al è stât un grant valôr. In merit al fat di studiâ filosofie, jo o pensi che no si à di studiâ pensant a un lavôr futûr, ma a deventâ une persone tal futûr. E la filosofie mi à judât in maniere determinante tal frontâ i lavôrs che o ai fat.
_
Filosof preferît?
Al è un cjamp sterminât, ma o stoi al zûc, le pensi tant che Nietzsche: dopo Platon, al è stât dit dut.
_
Tes tôs biografiis si lei che tu sês stât par agns ostîr. E cheste “cariere” cuant ise nassude?
Di subit a Padue, par mantignîmi tai studis. Po dopo o ai fat un pâr di agns a Londre simpri lavorant tai ambients, e dopo lu ai fat in Friûl, in ostariis bande Glemone.
_
Parcè sêstu lât a Londre?
Une sorte di refudâ chel che o vivevi: o stavi cirint me stes. No lu ai cjatât là, ma tornant in Friûl: chel che o cirivi al jere ca. Une robe fondamentâl e je stade cuant che al è mancjât gno nono: lui al veve cjamps, li che o levi a judâ di malevoie, sacramentant. Ma cuant che al è mancjât – muart lui o vin dât vie la tiere parcè che no i sarès stât daûr nissun – cheste robe mi è mancjade tanton, e o ai volût tornâ chel che mi veve dât, ancje se prime no mi jeri rindût cont.
__
E ce jentrial un filosof in ostarie?
Propit te ostarie o ai sperimentât chel che o vevi studiât: tal fevelâ cu la int e supant lis lôr storiis. Jo o ai simpri vût chê che la filosofie: le volevi spiegâ cun peraulis semplicis, che le capissin dut. O ai simpri pensât di spiegâle a mê none che e veve la tierce elementâr.
_ Tornant in Friûl, fasevistu chel di mistîr? Dongje di chel o insegnavi, al Ial, al Enaip. La matine o levi a scuele, la sere in ostarie. Dopo di un pôc, cheste vite e tacave a pesâ: no vevi contrat fis, ancje dal pont di viste economic e tacave a clopâ. E cussì o ai tacât a cjalâmi ator.
_
Tu sês deventât un divulgadôr tal cjamp enologjic…
Sì, intal 2015 o ai vût la fortune, daûr di une segnalazion di une amie, di tacâ a lavorâ cul Consorzi dal Cuei e Ramandul. A stavin cirint une persone che e fasès promozion dal teritori. Tacant a lavorâ mi soi rindût cont che nissun al promoveve il prodot, e jo o ai tacât a fâlu contant il teritori. Lant a informâmi su la storie che e jere daûr di cheste tiere par contâ il so vin. Dal 2019 o ai vierte la partide Iva e o ai tacât a lavorâ fasint consulence par ducj.
_
E tu lu fasis tant ben che chest an tu âs ricevût il premi «Ricordo Isi Benini» di bande dal Ducât dai Vins Furlans. Un “Oscar” enologjic.
O soi une vore braurôs di chest ricognossiment, parcè che al è intitulât a une grande persone, al è pardabon tant che un Oscar. Nol è dome un premi personâl, però, ma la consecuence de colaborazion cun tantis personis che mi judin e che mi àn judât.
_
Disimi de tô teorie che te promozion dal prodot no si à di contâ di vin, ma de ue, dai vignâi.
Al è sempliç: une vît e pues vignî coltivade in variis bandis dal teritori. Sedi chês “internazionâls” tant che Merlot, Pinot e vie indevant, sedi chês autoctonis. Nô o vin fat une ricercje capilâr su ducj i vignâi dal teritori: su ce ue che a àn metût, e parcè àno decidût di metile. Il parcè al è che e da il miôr in chel microclime li. Duncje il vin che al ven fûr al è unic. Se te promozion di chel prodot o rivìn a fâ capî chest, no tu pues vê concorence: al è inimitabil. O cjapât a model la lenghe furlane: pûr fevelant la stesse lenghe, di cemût che e fevele une persone tu capissis di dulà che e ven.
_
Duncje il non “Friulano” pal “ex Tocai” al va daûr di cheste teorie: si capìs il teritori di dulà che al è. Ma dâi un non in lenghe furlane no lu varessial fat someâ di plui part di cheste tiere?
Lis ultimis teoriis di neuromarketing a sconsein un non masse locâl. Par chel che al è il gno pinsîr e atitudin, si podarès ancje fâ, ma tignìn presint che al è un lavôr che si scuen decidi cumò e lavorâi parsore par 30/40 agns.
_
E la tô cariere leterarie cemût tachie?
Dongje de mê ativitât o ai tacât a contâ lis storiis che mi vignivin iniment fasint chestis esperiencis. Lis ai metudis suntune pagjine Facebook, e daûr di chel il gno amì e editôr Massimo Santarossa mi à proponût di dâlis adun intun libri, chel che al è deventât «Storie di vino e di Friuli-Venezia Giulia»
_
Fin cumò o vin fevelât simpri di Friûl. Cemût mai chest titul cun “Venezia Giulia” dapît?
Jo te mê ativitât o feveli simpri di Friûl e di Triest, no dopri chel tiermin. Disìn che ogni titul di libri al è compromès fra autôr e editôr.
_
Di une racuelte di contis al romanç publicât chest an, «Di terra e di vino». Cemût isal stât il salt, e di ce fevelial?
O ai vût simpri chê di scrivi un romanç, di fat o ’nt vevi tacâts za doi. Cheste volte mi soi metût sot cun chê di finîlu. Di fat ogni cjapitul di siere cun la peraule “fine”: ogni cjapitul al podeve jessi l’ultin. E je une storie familiâr furlane dal Friûl plui profont. La sgrimie che lu ai scrit e je stade chê di fâ une storie a la fradis Coen o Tarantino, ambientade in Friûl.
__
Il libri al è par talian. Tu tu fevelis in maniere naturâl ogni dì par furlan. Ti ise mai vignude voie di scrivi in marilenghe?
Al è un gno grant desideri, ma mi à frenât simpri no savê ben la grafie furlane, e daûr di chel la gramatiche. Pûr fevelant furlan ogni dì, tal scrivi al è tant che o fos malsigûr dal “imprest scriture”. Però ti anticipi che dentri dal an al vignarà fûr un gno libri di poesiis che no podevin che jessi par furlan, parcè che la poesie e je mari, e o podevi dome doprâ la marilenghe. ❚
……………………………………………………………………………….
FOCUS. Il neuromarketing
Vie pe interviste, Matteo Bellotto al fevele di “neuromarketing”. Ma ce isal?
◆ E je une dissipline emergjente – il tiermin al è stât madressût intal 2022 – che e dopre lis tecnichis neurosientifichis par creâ strategjiis di marketing miôr. Une des basis di partence e je che no simpri i individuis a disin ce che a pensin: vergogne, prejudizis o pôre dal judizi di chei altris a puedin condizionâ lis rispuestis ai cuistionaris li che si scrupule la eficacie di un prodot. Cun di plui, grande part des decisions di consum a son incussientis e duncje irazionâls.
◆ Il neuromarketing al dopre imprescj tant che eletroencefalograms par misurâ cualis areis dal cerviel che a vegnin ativadis dilunc de presentazion di un prodot. Par esempli, savint che la ativazion de part prefrontâl çampe e tocje lis emozions positivis, si analize la rispueste dal cerviel al stimul esterni.
◆ Altris elements che a puedin jessi doprâts par rilevâ lis emozions dal client a son la pression arteriose, il bati dal cûr, la condutivitât cutanie (lis variazions eletrichis de piel) e vie indevant.
◆ L’ûs di chestis tecnichis al à puartât a cuesîts etics: une associazion nordamericane, «Comerciâl Alert», e à fat une petizion cuintri dal ûs des tecnichis di neuromarketing, presentade ancje al Congrès nordamerican, enumerant lis consecuencis negativis pussibilis dal lôr ûs.
◆ Cui che al è a pro al sosten che cheste sience emergjente e je dome un strument e che dut al dipent dal ûs che al ven fat. «Il neuromarketing nol manipole» al sosten il professôr Vicenzo Russo, dal IULM «al misure chel che al fâs il marketing». ❚
………………………………………………………………………………………
LINK & LEAMS
Si pues seguî la ativitât di Matteo Bellotto su la sô pagjine Facebook: Matteo Bellotto – Storie di vino Friuli, o su Instagram li di @storiedivinofriuli ❚
