TERITORIS – SLOVENIE. Valdoltra, un dai plui innomenâts ospedâi slovens

Si cjate a un pas dal mâr, su la cueste adriatiche a Ankaran/Ancaran/Ancarano, frazion di Koper/Cjaudistrie/Capodistria. Al pâr jessi pardabon un lûc ideâl chel che a sielzerin tal 1909 i sorestants di chê volte, sot dal Imperi de Austrie-Ongjarie, par vierzi un centri par curâ i malâts di tubercolosi osteo-articolâr.
Sede de Crôs rosse prime americane e po taliane, fin al 1947 Valdoltra al da acet al Istitût jugoslâf pe tubercolosi osteo-articolâr. Tai agns Cincuante l’ospedâl al ven rignuvît e al tache a vê a ce fâ cu la ortopedie, tant che tal 1961 al cjape il non di “Ortopedska bolnišnica Valdoltra-Ospedâl ortopedic di Valdoltra”.
In dì di vuê chel su la rive adriatiche slovene al è un centri furnît dai plui modernis machinaris pe diagnostiche e pe terapie cun salis operatoriis par fâ intervents di artroscopie midiant il laser. In trê paveons si cjatin 190 jets, vâl a dî plui de metât dai puescj pai ricoverâts di ortopedie di dute la Slovenie. Intun an a vegnin a fâsi visitâ a Valdoltra uns 25 mil pazients, no dome slovens; di chescj 5700 a passin cualchi zornade in ospedâl. Ogni an si fasin almancul 3400 operazions. Tal nosocomi a lavorin 300 personis, di chescj 30 a son miedis specialiscj. Cun di plui, dispès il centri al da acet a congrès che a clamin dongje esperts di diviers paîs dal mont.

ALESSIO POTOCCO