TERITORIS – SLOVENIE. La sanitât slovene simpri plui in Europe

SANICADEMIA_ Siben che si feveli di un grum di agns di cooperazion transfrontaliere jenfri Friûl e Slovenie par chel che al rivuarde diviers cantins, dopo cuasi vincj agns de indipendence dal paîs nestri vicin a restin ancjemò une vore di oportunitâts di podê profitâ. Jenfri chestis la sanitât, tacant a fevelâ di une pussibile colaborazion jenfri i ospedâi di Gurize e Šempeter-Vrtojba. In cheste suaze e jentre la adesion de Slovenie in Sanicademia, la Academie internazionâl pe formazion dai professioniscj de salût, nassude tal 2006 in gracie de iniziative de nestre Regjon, dal Venit e dal land de Carinzie. Sul sît internet cuadrilengâl (par sloven, talian, todesc e inglês) www.sanicademia.eu al ven ilustrât che cheste idee e je nassude midiant la poie dal Progjet Interreg, imprest finanziât de Union europeane par sostignî iniziativis che a lein i paîs comunitaris confinants. La sede principâl e je a Vilac, sedis stacadis a son ancje a Vignesie e a Gurize, li dal Informest in vie Cadorna.
INTEGRAZION_ Di un pont di viste juridic, Sanicademia e je un Grup european di interès economic (sigle: Geie); par vie di cheste sô forme pluitost flessibil, e pues dâ acet a organizazions publichis di stâts diviers par slargjâ il numar dai socis. Cun di fat, un dai ultins membris de Academie al è l’ospedâl sloven di Jesenice, citât a nord di Bled.
L’obietîf primari di Sanicademia al è chel di meti dongje la ufierte formative pes professions che a son part dal mont de sanitât par rivâ a miorâ la cualitât de cure a pro dal citadin. I sistemis di gjestion de sanitât dai paîs e des regjons che ’ndi fasin part a vegnin confrontâts e su chest paragon a vegnin prontâts dai scambis informatîfs jenfri il personâl sanitari. L’intindiment al è chel di dâi vite a une integrazion sanitarie transnazionâl fasint cressi lis potenzialitâts clinichis e sientifichis dai singui operadôrs, clamant dongje cussì finanziaments publics di divignince Ue. Par sveltî la cognossince reciproche a vegnin insuazâts ancje cors di lenghe: fin cumò a son proviodûts cors di sloven, cravuat, talian, todesc e inglês, o starìn a viodi se prime o dopo al saltarà fûr ancje un cors di furlan.
GURIZE_ La sielte di Gurize come sede de Sanicademia tal Friûl-Vignesie Julie e vûl pandi la impuartance de citât dal Lusinç tant che citât-puint cu la Europe di Soreli jevât. No dome: Gurize e podarès deventâ un esempli di cooperazion sanitarie adun cul ospedâl di Šempeter-Vrtojba se si rivàs pardabon a integrâ i setôrs plui cualificâts dai doi nosocomis. Tant par dâ une idee: la polemiche resinte vignude fûr pe pussibile sparizion dal centri nassite tal cjâflûc dal Friûl di Jevât pe scjarsetât di fruts nassûts par an no varès mutîf di jessi par vie che, metint adun ancje i frutins che a nassin ogni an a Šempeter, si passe cuote 1.200 parts, jentrant ad in plen tai standards conseâts de Ue.
Cun di plui, l’ospedâl sloven al à un repart plui che valit di microchirurgjie; di bande lôr, za di timp i miedis di Šempeter si indrecin ai coleghis gurizans par doprâ il machinari de Tac, mintri Gurize e podarès valorizâ inmò di plui il so repart di Urologjie, «une des pontis di diamant dal nestri nosocomi», cemût che al à marcât il sindic di Gurize Ettore Romoli. Il quid in plui dal ospedâl sloven al è ancje un fatôr linguistic, stant che un bon 80 par cent dai miedis e dai infermîrs che a lavorin a Šempeter a san il talian.
ALESSIO POTOCCO