TERITORIS – SLOVENIE. Il sisteme sanitari in Slovenie

FIDUCIE CLIPE_ Stant a une resinte ricercje su la fiducie viers lis istituzions, i slovens a àn un ategjament ambivalent cuant che si trate di judicâ il lôr sisteme sanitari. Se si va a viodi ce che al à rispuindût un campion di 912 intervistâts par telefon tal mês di Zenâr stât, il vôt medi che i slovens a dan ae sanitât locâl si ferme a 3,09 suntune scjale di 5. Il nivel plui alt lu si veve tocjât tal Avrîl dal 2000 cun 3,55, chel plui bas tal Jugn dal an passât (3,01).
Jenfri lis istituzions che a àn a ce fâ in maniere direte cu la int, il sisteme sanitari si cjate a mieze strade. A gjoldi di plui la fiducie dai slovens al è prin di dut l’euro (3,49): la monede uniche e ven tignude tant che simbul de Europe e de stabilitât economiche. Cun trê ponts e 47 al ven subit dopo l’esercit; un tic plui indaûr la scuele. Ai ultins puescj jenfri lis istituzions cjapadis dentri dal scandai il Guvier, i partîts politics e la Glesie.
MIEDIS DI FAMEE_ Di une figure peade al mont de sanitât invezit i slovens si fidin cence fal: il miedi di famee. Vot su dîs a disin di fidâsi dal dut dal propi miedi, cun pontis di cuasi il novante par cent jenfri la int cun plui di 60 agns. Al cres ancje il numar des prescrizions che si domandin ai miedis: intun an a son cuasi 800 par ogni cent abitants, cuntun aument di passe il 20 par cent rispiet ae metât dai agns Novante. Il cost des prescrizions par om tun an al è in fuarte cressite: in medie aromai si son passâts i 200 euros. In totâl, ogni an la aministrazion statâl e spint pal setôr sanitari pôc plui dal 8 par cent dal pil. Ma i risultâts si viodin: la sperance di vite si è slungjade tocjant i 79 agns pai oms e i 82 pes feminis, vâl a dî par ducj uns 6 agns di plui rispiet al 1986.
OSPEDÂI_ In Slovenie i ospedâi a son 29, ben distribuîts su dut il teritori nazionâl. I jets a disposizion dai malâts a son 9400: adiriture un tierç in mancul rispiet a trente agns indaûr. Tal 2007 a àn scugnût lâ tai nosocomis 362 mil di lôr, che in medie a son stâts ricoverâts une setemane. L’ospedâl plui grant al è il Centri clinic di Lubiane cun 2700 jets, plui indaûr il Centri clinic universitari di Maribor cun 1700 jets.
ASSOCIAZIONS DI CATEGORIE_ Une des associazions plui impuartantis e je la Zdravniška zbornica Slovenije (Associazion dai miedis de Slovenie). Cheste socie e à cuasi 8300 membris jenfri miedis e dentiscj; il sît internet (par sloven e par inglês) al è www.zdravniskazbornica.si.
Ancje se tai ultins dîs agns il lôr numar al è cressût in maniere costante, la medie di 240 miedis su cent mil abitants e lasse la Slovenie indaûr rispiet ai paîs plui grancj dal Continent Vieri. Lis robis a cambiin invezit se si fevele di infermîrs: ‘ndi son cuasi 800 par cent mil abitants. Il numar dai dentiscj al è lât sù tai ultins agns fermantsi a cuote 60 par cent mil abitants, in linee cu la medie dai paîs de Ue. A son invezit pôcs i farmaciscj, 50 su cent mil, mintri che la medie europeane e rive a passe 70.
ALESSIO POTOCCO