TERITORIS – SLOVENIE. I zovins slovens dal tierç mileni

STATISTICHE_ In ocasion de Zornade internazionâl dai zovins, che come ogni an e cole ai 12 di Avost, si è sierât ancje l’An internazionâl de zoventût, inmaneât de Onu, la Organizazion des Nazions unidis. In Slovenie, l’Ufici di statistiche (www.stat.si) al à presentât un studi inzornât su la evoluzion des ativitâts e dal stîl di vite de fasse plui zovine dal paîs nestri vicin, tirant fûr gnovis e curiositâts interessantis sui slovens che a àn dai 15 ai 34 agns.
15-16 AGNS_ Tacant dai plui zovins, al ven fûr che dome l’1,5 par cent di fantats e fantatis che a àn 15 e 16 agns nol vîf cun nissun dai gjenitôrs. Al è di restâ scaturîts pal fat che trê zovinis di 15 agns a son bielzà deventadis maris.
18 AGNS_ Chei di 18 agns invezit a son a stâ cun almancul un gjenitôr tal 96 par cent dai câs; in particolâr, a son 227 lis fantatis di cheste etât che a vivin di bessolis.
24 AGNS_A 24 agns a vivin cuntun gjenitôr, o cun ducj i doi, trê zovins su cuatri e dôs fantatis su trê, a testemoneance dal fat che lis zovinis a àn voie di lâ fûr di cjase a pene che al è pussibil; cun di plui, il 16 par cent di lôr cun cheste etât a son za maris. Di chei di 24 agns, in dut al vîf di bessôl un su nûf.
29 AGNS_ No cate che i agns a corin e che si svicine “cuote 30”, a 29 agns a vivin inmò li de famee che a son nassûts pôc plui di metât dai fantats e pôc mancul di un tierç des fantatis; di bessôi a son a stâ un su 7. Cuestion maternitât: poc plui di metât des slovenis di 29 agns no à inmò vût un frut, intant che une su cinc ’nd à bielzà doi.
34 AGNS_ Culì o sin za tune fase li che i esperts di demografie e sociologjie a fevelin di “zovins madûrs” o “zovins adults”. Dut câs, i slovens che a son ancjemò a stâ cui gjenitôrs a son un bon 33 par cent; invezit lis feminis che a vivin te famee li che a son cressudis a son une su vot. Chei che a vivin di bessôi (duncje cence un compagn/une compagne) a son pôcs, dome un su vot. Intant e cres la voie di vê fruts: une femine di 34 agns su nûf ’nd à bielzà trê, ma pôc plui dal 20 par cent no ’nd à.
55%_ In totâl, stant ai ultins dâts, in Slovenie i zovins jenfri i 18 e i 34 agns che a vivin in dì di vuê cuntun o cun ducj i doi i gjenitôrs a son cuasi il 55 par cent. La sielte e je a dî il vêr dispès un oblic, par vie che il 77 par cent dai zovins dai 18 ai 24 agns a son ancjemò cjapâts tal studi. In plui, la crisi economiche che e sta tibiant la Europe e cjape dentri ancje la Slovenie: i zovins a restin a vivi cui gjenitôrs par mancjance di lavôr e par vie che i afits, massime tes citâts plui grandis, a son masse cjârs.
SIUMS_ Di chê altre bande, però, un dai mutîfs che a puartin i zovins a stâ in famee al è che a sperin di cjatâ un lavôr che ju meni lontan dal puest li che a son cressûts, ancje tal forest. Chest al vâl soredut par cui che al è nassût intai paîs plui piçui, li che lis sperancis di cjatâ une buine ocupazion (massime in chescj ultins agns) a son pardabon scjarsis.
ALESSIO POTOCCO