SIERADE_ Il nûl di cinise jessût fûr ae metât di Avrîl dal vulcan Eyjafjallajökull in Islande al à causionât problemis ancje pal spazi aeri sloven: il ministeri pai Traspuarts al à blocât i avions tacant de sere dai 16 di Avrîl fintremai ai 21 di buinore. In dut a son stâts centenârs i svoi scancelâts cun partence e rivade tai trê aeropuarts internazionâi de Slovenie, vâl a dî chei di Lubiane, Maribor e Portorož/Portorose. Par dîle dute, la cuistion no à cjapât dentri il scjâl de capitâl slovene, stant che l’aeropuart che dal Jugn 2007 al puarte il non di un dai «paris de Patrie» (Jože Pucˇnik, muart tal 2003) al è stât sierât dai 7 ai 21 di Avrîl par asfaltâ la piste di jevade e par instalâ gnûfs dispositîfs eletronics. Lungje 3.300 metris e largje 60, la piste e jere stade asfaltade la ultime volte tal Istât dal 1978 e par chest e à vût bisugne di un inmodernament par garantî plui sigurece. Pai lavôrs a son stâts spindûts dîs milions di euros, mintri che il mancjât vuadagn pes dôs setemanis di sierade al è stât di un milion dusinte mil euros.
LUBIANE_ Il Letališcˇe Jožeta Pucˇnika (Aeropuart Jože Pucˇnik – www.lju-airport.si) di Brnik, a 27 km a nord di Lubiane e a 11 km a sud di Kranj, al è il scjâl plui impuartant di dute la Slovenie. Screât ai 24 di Dicembar dal 1963, i prins svoi uficiâi a son tacâts ai 9 di Zenâr dal an dopo cun destinazion Belgrât e Alzêr e cun rivadis di Belgrât, Dubrovnik e Londre. Dopo une cressite continuade tai agns Setante e Otante, l’aeropuart al ven sierât dal Setembar 1991 al Fevrâr 1992 par vie de vuere: dome tal 1999 il scjâl al è rivât a passâ la cuote massime di viazadôrs che si regjistrave prime de vuere. Il milion di passizîrs al è stât tocjât pe prime volte tal 2004; il numar plui alt si lu à vût tal 2008 cuntun milion 673 mil, che però, par vie de crisi mondiâl che e sta tibiant ancje il setôr de aviazion, tal 2009 al è lât jù a un milion 433 mil (mancul 14 par cent). Stes discors pes marcjanziis: 17 mil 200 toneladis tal 2008, 14 mil 300 l’an passât (-17 par cent).
Di là de crisi, la societât che e à in gjestion l’aeropuart di Lubiane (li che il Stât al è proprietari dal 50,7 par cent des azions – dome il 0,77 par cent dai azioniscj al è forest) e previôt di tocjâ par chest an un milion 400 mil passizîrs e dentri dal 2015 cuote doi milions 200 mil. Il 76 par cent dai svoi al è tes mans de compagnie di bandiere slovene Adria Airways (www.adria.si); par chel che al rivuarde lis destinazions, il 9 par cent dai svoi al va a Londre, il 8 a Istanbul e a Parîs. Tal scjâl di Lubiane a lavorin uns 400 personis, uns cincuante di mancul rispiet a un an indaûr.
MARIBOR_ La sierade dal aeropuart de capitâl e à fat deventâ il scjâl di Maribor Letališcˇe Edvarda Rusjana (Aeropuart Edvard Rusjan – www.maribor-airport.si) il plui impuartant dal pais par dôs setemanis. Maribor dut câs al veve cjapât il puest di Lubiane za par un pâr di mês tal Istât dal ’78 e po par une setemane tal ’92. L’aeropuart dal cjâf lûc de Stirie slovene al è in ativitât dai 29 di Mai dal 1976: la sô piste e je lungje 2.500 metris e largje 45, jenfri il 2002 e il 2004 al à vût un grues intervent di potenziament. Adria Airways e à cussì scugnût stralozâ tal secont scjâl sloven, che si cjate a Slivnica a 12 km a sud di Maribor: par vignî incuintri ai utents a son stadis prontadis liniis di autobus a gratis fin al aeropuart de capitâl, lontan 130 km.
SVOI ANCJE A RONCJIS_ Altris compagniis a àn invezit decidût in maniere divierse. La Turkish Airlines e je lade indevant cui svoi di e par Maribor, ma cence sigurâ il traspuart a Lubiane; lis compagniis di Serbie, Montneri e de Republiche ceche a àn scancelât i lôr svoi, mintri che la Air France e à pontât sul scjâl di Roncjis di Monfalcon, garantint il spostament di Lubiane cul autobus a gratis. Chest al à fat cressi, almancul par un pâr di setemanis, la cuote dai passizîrs slovens, cravuats e carinzians che a svolin di Roncjis, che a rapresentin un cuint dal totâl.
PORTOROŽ_ Il tierç aeropuart internazionâl (www.portoroz-airport.si), il plui piçul, si cjate su la cueste dal mâr Adriatic a Secˇovlje/Sicciole, localitât a 6 km di Portorož/Portorose e a 20 di Cjaudistrie/Koper/Capodistria, ma dome a uns 300 metris dal confin cu la Cravuazie. Chest scjâl al è stât viert tal Setembar dal 1962 par garis sportivis; lis gnovis struturis e la piste in asfalt a son dal ’72. La piste, tacade dal mâr framieç des salinis, e je lungje 1.200 metris e largje 30: di agnorums in ca si fevele di slungjâle a 1.800 metris par podê permeti di cjapâ tiere ancje ai Boeing 757. Intant, ai 15 di Avrîl e je stade inviade la linie cun Belgrât: paiant 136 euros, si pues lâ e tornâ de vecje capitâl jugoslave cun doi svoi par setemane, la joibe e la domenie, cuntun avion Atr-72 de compagnie serbe Jat. La linie, tornade in vite daspò cuasi vincj agns, e sarà in prove fintremai ai 30 di Jugn: se i afârs a laran ben, il servizi al sarà sprolungjât.
ALESSIO POTOCCO
Sindic jo mame / “La nestre int no à mai molât. Covente fâ, no lamentâsi, par saltâ fûr dal pantan”
Walter Tomada
Alessandro Marangoni: la Aclif e deventarà istituzion di riferiment pai furlans “La Assemblee dai sindics furlans e je une realtât necessarie. E cul timp e deventarà ancjemò di plui un pont di riferiment pe identitât de nestre int”. Al è sigûr di chest Alessandro Marangoni, prin citadin di Dartigne, che al crôt tant inte Aclif […] lei di plui +
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
Ricorence / Pier Pauli Pasolini om contraditori e segnâl di contradizion
Pre Toni Beline
Tal centenari de muart di Pier Pauli Pasolini o ripuartìn a tocs la tierce part dal libri scrit di Antoni Beline tal 1993 ‘Trilogjie tormentade’, che e rivuarde propit il poete di Cjasarse I. RISPIETÂ IL MISTERI DAL OMLa sience plui dificile e je la cognossince di se stes. E se al è grivi cognossi […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +