TERITORIS – OMS DI LIBERTÂT. Michael Gaismair, in vuere cuintri de tiranie (Tirôl)

Intant che in Friûl si ricuardin i 500 agns dal riviel de Joibe Grasse, si à di fevelâ dal tirolês Michael Gaismair (1490 – 1532), comandant militâr e ideolic de rivolte contadine tirolese dal 1525.
Nomenât cjapitani dai contadins in riviel intal Mai dal 1525, Gaismair al clame dongje une Diete tirolese là che al domande al arciduche Ferdinant di Asburc che ducj a sedin compagns denant de leç, che a sedin eliminâts i privileçs dai nobii, il dirit di elei i judiçs e i predis. Pôc dopo vê cjatât un compromès cui rivoltôs, l’arciduche al mancje ae peraule dade: al ritire lis concessions fatis, al fâs impresonâ Gaismair e al invie la repression.
Dopo di cualchi setemane, Gaismair al rive a scjampâ in Svuizare là che si svicine al riformadôr protestant Ulrich Zwingli. Propit in Svuizare al met jù i Statûts pal Tirôl gnûf, che al varà di deventâ une republiche di contadins e minadôrs cun capitâl Brixen / Porsenù / Bressanone. Tornât in patrie al invie une gnove rivolte ma, cundut di diviersis vitoriis sul cjamp, al scugne ritirâsi intal teritori de Republiche di Vignesie, in chei agns in vuere cul Imperi.
Gaismair al combat al flanc di Vignesie cuintri dai imperiâi, ma nol rive a otignî trupis gnovis par tornâ a inviâ il riviel in Tirôl. Al mûr tal 1532, sassinât di doi soldâts che a volevin la taie metude sul so cjâf di Ferdinant di Asburc. A cinc secui di distance la sô figure e reste un simbul de bataie pe libertât dal om cuintri di ogni forme di tiranie.
CARLI PUP