TERITORIS – OMS DI LIBERTÂT. Elsa Laula Renberg, une bataie pai dirits nazionâi e des feminis (Sami)

Lis feminis che a partegnin a di une comunitât minorizade si cjatin a vivi doi nivei di opression: nazionâl e di gjenar. Par saltâ fûr di cheste dople condizion di minorizazion a son duncje obleadis a sacrificis plui grancj dai oms, dispès cence che i lôr sfuarçs a vedin il just ricognossiment.
Al è ce che i à tocjât ancje a Elsa Laula Renberg (1877 – 1930), cundut che e sedi la mari de cooperazion tra lis diviersis comunitâts sami. Chest popul, di fat, al vîf intune tiere (Sápmi) dividude dai confins tirâts sù in maniere artificiâl di Norvegje, Svezie, Finlande e Russie. Il prin moment impuartant par superâ cheste division al è stât il congrès unitari che si è tignût a Trondheim intal 1917. La centralitât di chest event e je testemoneade dal fat che propit la date dal so davuelziment (6 di Fevrâr) e je stade sielzude tant che fieste nazionâl par ducj i sami. A son pôcs però chei che a ricuardin che, se il congrès si è tignût, al è stât massime in gracie dal lavôr di cheste femine.
Fie di arlevadôrs di renis, dopo vê studiât di ostetriche, Elsa Laula Renberg si è impegnade inte bataie pai dirits dai sami (a tacâ di chei cuintri de assimilazion e pal possès des tieris dai vons) e par chei des feminis. E à fondât intal 1904 la prime organizazion nazionâl sami e intal 1910 la prime organizazion feminine di chest popul. E je ancje la prime scritore sami. Un esempli, masse dispès dismenteât, dal contribût centrâl des feminis inte bataie pai dirits dal lôr popul.
CARLI PUP