TERITORIS – INTERNAZIONÂL. OMS DI LIBERTÂT. Giovanni Maria Angioy (Sardegne)

Giovanni Maria Angioy, l’eroi de sarda rivolutzione (Sardegne)
Ai 28 di Avrîl e cole sa dia de sa Sardigna, la fieste che e ricuarde la zornade dal 1794 cuant che e je tacade la sarda rivolutzione: un moviment di popul cuintri dal guvier di stamp coloniâl dai Savoia, ma ancje cuintri dal sisteme feudâl che al pesave su la plui part de isule.
Il no dal re piemontês aes cinc domandis fatis indenant dal Parlament sart al da plui fuarce ae ale radicâl dal moviment patriotic che e à tra i siei rapresentants principâi il judiç de Udience Reâl Giovanni Maria Angioy (1751 – 1808). Propite lui al ven sielzût dal guvier di Casteddu / Cagliari par tornâ a puartâ la calme te part disore de isule, là che i nobii a cirin un acuardi separât cui Savoia e il riviel antifeudâl al è plui fuart. Nomenât Alternos, cun podês di vicerè, ai 28 di Fevrâr dal 1796 Angioy al jentre in maniere trionfâl Tàtari / Sassari dulà che si da dongje cui republicans e al devente il pont di riferiment pal moviment che si bat par abolî la feudalitât.
Il front patriotic moderât però si met adun cui nobii e al mande un esercit cuintri dal Angioy che, ai prins di Jugn, al ven batût dongje di Aristanis / Oristano. Obleât a scjampâ de isule, al domande al guvier rivoluzionari francês un jutori par liberâ la isule dal jôf dai piemontês e dai feudataris, ma il progjet nol va a bon fin. Al mûr in esili a Parîs intal 1808.
In dì di vuê Giovanni Maria Angioy al ven ricuardât tant che l’eroi de sarda rivolutzione e il pari de idee di une republiche sarde indipendente.
CARLI PUP