Sfuei Mensîl Furlan Indipendent
Archivi de Patrie

TERITORIS – AUSTRIE. Sisteme sanitari esemplâr, ma cu la pôre di lâ a piês

............

Trê su cuatri austriacs di passe 15 agns a son apaiâts de lôr salût gjenerâl: cun di fat il 75,5 par cent di lôr ae domande su la condizion di salût fate dal Istitût nazionâl di statistiche Statistik Austria a àn rispuindût «une vore buine» o «buine». Dome il 6 par cent de popolazion al stime la sô situazion atuâl par ledrôs cun «pocje salût» o «une vore mâl». Scuasit une persone su cinc (18,5 par cent) al à sielzût la categorie di rispueste «mediementri». I risultâts a pandin une volte di plui il fat che lis feminis a valutin la lôr salût piês rispiet ai oms.
TINDINCE POSITIVE_ I risultâts vignûts fûr jenfri il 1991 e il 1999 par chel che al inten il stât di salût percepît a pandin une tindince gjenerâl positive. La percentuâl de popolazion che e valute la proprie salût otime o buine e je cressude dal 71 par cent dal 1991 al 74 dal 1999, tant che in dì di vuê e tocje il 76 par cent.
IL MIÔR SISTEME SANITARI IN EUROPE_ Il sisteme sanitari austriac al garantìs a ducj i citadins curis medichis a gratis, cjapant dentri ancje i  trataments specialistics. Secont un studi de «Health Consumer Powerhouse» (www.healthpowerhouse.com), une innomenade aziende svedese di professioniscj de salût cun sede a Stocolme che ogni an e da dongje un elenc dai miôr sistemis sanitaris de Union europeane, la Austrie e je un leader par chel che al rivuarde lis curis medichis.
Si trate pardabon di un sisteme sanitari orientât viers il consumadôr: essenziâl par cheste valutazion a son stâts i timps curts di spiete pes visitis medichis e pes operazions chirurgjichis, l’acès diret ai miedis -une visite li di un miedi e je pussibile za te stesse zornade- e il sucès che a dan lis terapiis fatis seguî.
Tal ultin ranking EHCI 2009 total ranking si viôt il prin puest dai Paîs Bas, mintri che la Austrie e reste ancjemò ben posizionade al cuart puest.
UN ASPIET NEGATÎF: SISTEME DI DÔS CLASSIS_
Za di agns, e ancje te campagne eletorâl di Viene di chest an, si à vût fevelât di aspiets negatîfs dal sisteme sanitari, che al riscje di deventâ un sisteme di dôs classis. Intant ducj a àn di paiâ une cuote fisse: 10 euros par an pe cjarte sanitarie eletroniche e-card, 5 euros invezit par ogni medisine cun recipe, co-paiaments pai jutoris medics tant che ocjâi, pes curis termâls e pe permanence in ospedâl. I plui alts a son i coscj pes malatiis cronichis o pes curis ortopedichis.
Tal Otubar stât si è vierte di gnûf la cuistion sul sisteme di dôs classis, vâl a dî i citadins che a àn la assicurazion obligatorie e chei privilegjâts cuntune assicurazion privade.
Inmò plui serie e je la situazion des terapiis pai fruts e pai zovins soredut tal cjamp de psicologjie e fisioterapie. Dai dîs al 15 par cent dai fruts e dai adolessents austriacs a àn bisugne di un tratament specialistic. Dome a Viene si cjatin plui di 850 fruts intes listis di spiete, li che e tocje vê pazience ancje 24 mês. Cun di plui, une vore di fruts a domandin terapiis multiplis, che par reson di coscj no vegnin plui ufiertis.
In Gjermanie, secont i critics, la assicurazion obligatorie e spint tal cjamp di terapiis specialistichis trê voltis tant che in Austrie.
PÔRE_ Ancjemò, plui dal 60 par cent de popolazion si declare «une vore sodisfat» de assistence sanitarie, stant a un scandai dal Istitût pes analisis strategjichis (ISA). Dut câs, trê cuarts di lôr a àn pôre che la situazion e larà in piês tai prossims agns. Secont il scandaist Peter Filzmaier, la percentuâl dai preocupâts in confront ae Sierade 2009 e je lade sù di 15 ponts percentuâi.
Janez Erat

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +