Sfuei Mensîl Furlan Indipendent
Archivi de Patrie

TERITORIS – AUSTRIE. Otto di Asburc-Lorene 1912-2011: il fi dal ultin imperadôr austriac

............

Otto di Asburc-Lorene, fi dal ultin imperadôr austriac Carli I e de sô femine Zite, al è muart ai 4 di Lui dal 2011 ae etât di 98 agns te ‘Cjase Austrie’ a Pöcking, in Bavarie. L’arciduche ereditari al jere nassût 98 agns indaûr a Reichenau, te Basse Austrie, ai 20 di Novembar dal 1912. Al è stât il Cjâf de Cjase di Asburc dal 1922 al 2007.
Dal 1979 al 1999 al à lavorât tant che deputât dal parlament european e par plui di 30 agns al è stât ancje a cjâf dal moviment paneuropean impastanât za tai agns Trente dal secul passât.
La vite dal fi dal imperadôr e riflet la storie austriache dal ultin secul. Otto, nassût tal 1912, intune interviste publicade sul ‘Presse’ tal 2007, al dîs ”J ai cognossûts ducj di persone, l´imperadôr Francesc Josef, i politics prin e daspò di Hitler”.
Dopo la muart dal imperadôr Francesc Josef, il pari di Otto, Carli, al è proclamât imperadôr e Otto al è diventât princip ereditari. Tal 1918, daspò la disfate te Prime Vuere Mondiâl, la Austrie e je proclamade republiche, i Asburcs dopo 600 agns di domini di un imperi mondiâl a son obleâts a lassâ il paîs, prime par lâ in Svuizare, po a Madere, e dopo si stabilissin tal Paîs Basc.
Al fevele siet lenghis_
Tirât sù di sô mari Zite, rigorosementri religjose, si è diplomât ae scuele superiôr tal Paîs Basc; dopo tal 1935 al à finît i siei studis in Belgjiche. Ancje tal esili, al cresseve tal spirt monarchic austroongjarês: preparantsi pe sô funzion future, al à imparât dongje dal sô todesc natîf ancje l’ongjarês, il cravuat, l’inglês, il spagnûl, il francês e il latin. Al à scrit i siei libris no dome in todesc, ma ancje in ongjarês e in francês. Propit il sô interès pes culturis de viere monarchie, soredut par chê ongjarese, al spieghe la sô popolaritât ancje in Ongjarie.
Nemì di Hitler: combatent par une Austrie indipendente
Hitler, cressût sot dai Asburcs, al à vude pôre dal restaur de monarchie. Chest al spieghe il non in codiç ‘Otto’ sielzût pal Anschluss tal Març dal 1938.
I naziscj prin a àn cirût di tirâ de lôr bande i Asburcs, Otto invezit al à viodût il pericul e al à domandât al cancelîr austriac di difindisi de invasion. Tant che nemì di stât, al è scjampât tai Stâts Unîts dulà che si è cjatât di persone cul president Franklin D. Roosevelt par discuti a pro di un restaur di un Stât indipendent austriac.
Grant european, ma ancje cun leams cul ditatôr Franco_
Lu descrivin tant che un opositôr dal nazisim, ma ancje tant che amì dal ditatôr Franco e om cuntun mont retrospetîf cristian. Franco par lui al simbolizave une sorte di autoritarisim, un domini catolic necessari cuintri il comunisim. Otto si è dedicât totalmentri ae lote cuintri il comunisim e ae riunificazion de Europe.
Tant che patron dal Paneuropa-Picnic al à vierte la tendine di fier_
Dal 1973 al 2004 al è stât president de Union Paneuropeane. Tant che president, tal Avost dal 1989 al organize l´innomenât ‘picnic paneuropean’, vierzint pe prime volte la tendine di fier: plui di 600 citadins de Republiche Democratiche Todescje a son scjampâts a ovest.
Propit il sô rûl di combatent dal comunisim, i à purtât lis simpatiis tai paîs dal bloc ex-socialist, massime in Ongjarie e in Cravuazie.
No cate chescj sucès storics, al reste une figure dibatude in Austrie. Fin al 1961 i è stât dineât l’ingrès te sô patrie; soredut i politics di çampe lu àn criticât pe sô tesi di vitime ‘Opferthese’ che e trate la Austrie dome tant che vitime dal nazisim. Une interpretazion acetade dai conservatîfs e dal cjamp nazionâl che al vûl relativizâ il rûl de Austrie te seconde vuere mondiâl.
La figure di Otto Asburc e reste une relicuie di un imperi smavît
I austriacs, soredut il cjamp conservatîf catolic, si insumiin vulintîr de Austrie di une volte plui grande e impuartante. No cate il grant interès dai media e de élite politiche internazionâl, Otto Asburc nol à vût uficialmentri un funerâl di stât. La Republiche austriache i à fat onôr al ultin esponent dal gran passât cu la presince dal cjâf di stât Heinz Fischer, dal cancelîr Werner Faymann cui rapresentants dal guvier e dal parlament, e dai esponents de nobiltât e politiche europeane.
Il rît funerari al è durât dai 5 ai 11 di Lui a Pöcking e Munic in Bavarie, in presince dal guvier bavarês; ai 12 di Lui al è tornât in Austrie prin a Mariazell e il 15 di Lui a Viene, cu la celebrazion dal gardenâl Schönborn. Dopo la messe, ai 16 di Lui la casse di Otto e je stade puartade te glesie dai capucins par jessi metût dongje di chel de sô femine Regjine, muarte tal 2010, te cripte dulà che a polsin ducj i imperadôrs di Austrie dal 1633 a vuê.
In ogni câs, Otto Asburc (http://www.ottovonhabsburg.org/) nol jere dome un princip cence tron, ma un politic atîf rispietât soredut pai siei merits par une Europe cence confins.
JANEZ ERAT

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +