TERITORIS – AUSTRIE. Novantesim cjadalan dal plebissît carinzian

Ai 10 di Otubar stâts cirche 16 mil partecipants si son presentâts in costums colorâts e cun cjars decorâts tal centri storic di Clanfurt. Il president federâl Heinz Fischer, il cancelîr Faymann (Spoe) e il governatôr Gerhard Dörfler (Fpk) a àn esprimût la volontât di risolvi la cuistion dai cartei bilengâi dentri dal 2012. Cun Bad Eisenkappel, Globasnitz, Ludmannsdorf e Feistritz si presentavin ae sfilade in vie uficiâl ancje cuatri comuns bilengâi. Za mês indaûr l’ex cancelîr conservadôr Schüssel (Oevp), autôr dal document Papier Schüssel-Haider, al à domandât intune interviste su la Kleine Zeitung une soluzion de cuistion de segnaletiche bilengâl in Carinzie tal an dal 90m cjadalan dal plebissît.
Tal 1920 la Austrie e fasè un grum di promessis ae popolazion slovene che a son stadis dome in part mantignudis. «Il novantesim cjadalan al sarès il moment just par sistemâ lis robis – si domandave il vieri cancelîr –; o pûr scuegnino spietâ il centesim aniversari?».
Une soluzion e sarès impuartante ancje pe Carinzie in chest moment, viodût che cussì si podarès corezi la brute imagjin dal paîs e ancje inviâ un segnâl positîf viers il forest. Il tratament des minorancis in Austrie al è dut câs in gran part esemplâr: in Carinzie cirche un tierç dai fruts de scuele publiche a imparin in maniere volontarie la lenghe slovene. Par aiar al reste ancjemò dome il cantin ingredeât dai cartei.
L’ex cancelîr Wolfgang Schüssel al è a favôr di une soluzion basade sul document di consens dal professôr Karner dal 2006: il moment par un acuardi su 141 localitâts cu lis indicazions bilengâls al è stât mancjât dome di pôc. Il president Heinz Fischer al à fevelât tal so discors in maniere clare clamant a cjatâ une pronte soluzion in Carinzie fasint un apel al governadôr Gerhard Dörfler e al parlament par che a risolvin il probleme viert dai cartei in colaborazion cul guvier federâl. «I timps a son madûrs!» al à dit Fischer, e lu à dit ancje par sloven: «čas je zrel!».
Ianez Erat