Sfuei Mensîl Furlan Indipendent
Archivi de Patrie

TERITORIS – AUSTRIE. La istruzion superiôr garantide a gratis e vierte a ducj

............

FUARTE CRESSITE DAI AUSTRIACS CUN ISTRUZION SECONDARIE_ Tes ultimis desenis di agns il nivel di istruzion de popolazion austriache di etât jenfri i 25 e i 64 agns al è montât sù a fuart. La percentuâl di popolazion dome cu la istruzion obligatorie invezit e je plombade jù, passant dal 57,8% dal 1971 al 17,4% dal 2008. Purpûr si regjistre un aument di cirche 29 ponts percentuâi, passant dal 39,4% al 68,8%, te proporzion di popolazion che e à une istruzion secondarie. Tal stes periodi, tal 2008 la percentuâl di popolazion cun istruzion post-secondarie e je cressude di cinc voltis (dal 2,8% al 13,8%).
Chest procès purtrop al vâl dome pai oms. Cun di fat, plui di un cuint des feminis di etât jenfri i 25 e i 64 agns (di precîs il 22,3%) nol à otignût un nivel plui elevât che no la istruzion obligatorie a pet dai oms, che a regjistrin dome il 12,5%.
LIS UNIVERSITÂTS A PATISSIN PE MANCJANCE DI SPAZI E BÊÇS_ Lis riformis e i cambiaments dai sistemis sociâi e politics a nassin dispès dai moviments dai students. Tai ultins agns il numar des iscrizions al è cressût e cu la crisi economiche si son taiadis lis risorsis finanziariis. Stant che in Gjermanie si pain impuestis scolastichis mintri che in Austrie no, si è regjistrade un fuarte cressite dai students vignûts de stesse Gjermanie: par chest lis universitâts a patissin pe mancjance croniche di spazi. Mancul puescj e un futûr mancul sigûr tal mont dal lavôr a àn causionât fuartis protestis di bande dai students tal Otubar dal 2009 cuintri la introduzion dal gnûf sisteme Bachelor-Master.
SISTEME BACHELOR-MASTER_ Il sisteme di studi austriac si cjate intune fase di riorganizazion. Dispès a convivin il model tradizionâl di cors di lauree cui titui Diplom e Magister adun cui gnûfs cors di lauree Bachelor e Master introdusûts secont il model dal procès di Bologne.
Bachelor:  Il bachelor, ancje se ben cognossût sul plan internazionâl, al è dal dut gnûf in Austrie; chest titul di studi si pues otignîlu in dome sîs semestris. Il bachelor al corispuint ae lauree trienâl taliane e al è essenziâl pal pas academic successîf: il master.
Master: doi agns di programe di studi. Par fâ il master al è necessari jessi in possès di un bachelor. Il master al cjape il puest dai vieris titui todescs Diplom e Magister.
Doktorat: Tant che in Italie, daspò la conclusion di un percors di studi, ancje in Austrie e je la possibilitât di davuelzi un dotorât di ricercje fasint un lavôr sientific.
ISTRUZION BILENGÂL_ In Austrie lis minorancis ricognossudis par leç à an in diviersis regjons il dirit ae istruzion te lôr marilenghe. Il crauat e l’ongjarês si insegnin scuasit dome tes scuelis elementârs; a nivel di istruzion secondarie invecit, chestis lenghis a vegnin dopradis tant che lenghis veicolârs dome in dôs scuelis, vâl a dî te scuele medie a Großwarasdorf e tal gjinasi trilengâl crauat-ongjarês-todesc a Oberwart. Tal Burgenland i cambiaments sociâi capitâts dai agns 1960 in ca a àn trasformât il caratar di dute la regjon: i paîs contadins di maiorance crauate dal Burgenland a son deventâts des vilis di pendolârs. Il crauat al à pierdût dal dut la funzion di jessi il mieç di comunicazion naturâl dai paîs agricui, si è ridusût a un lengaç de sfere familiare e des celebrazions de glesie.
I FRUTS NO DOPRIN LA LENGHE MINORITARIE IN FAMEE_ I insegnants si cjatin denant une situazion dificile viodût che la plui part dai fruts no doprin la lenghe nancje tes lôr fameis. Tal 1999 dome il 24 par cent dai arlêfs des scuelis elementârs bilengâls a fevelavin il crauat tant che lenghe mari. Soredut tal cjamp des scuelis professionâls mediis e superiôrs la situazion e je basote: mintri che il 12 par cent dai arlêfs des elementârs al frecuente une classe bilengâl, dome il 3,1 par cent dai students al partecipe ae educazion bilengâl.
IN CARINZIE EDUCAZION BILENGÂL IN CRESSITE_ Di no di crodi: ancje i fruts di lenghe todescje a imparin vulintîr il sloven te scuele elementâr. La iscrizion dai arlêfs austriacs e je lade parsore dal 40 par cent dal totâl. Dut câs no mancjin lis discussions su cemût miorâ il sisteme de scuele bilengâl. In Carinzie si varès di adotâ il sisteme scolastic dal dopovuere, vâl a dî un insegnament bilengâl obligatori par ducj: cheste e je une precise domande puartade indevant dal professôr de Universitât di Clanfurt Vladimir Wakounig.
JANEZ ERAT

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +