Sfuei Mensîl Furlan Indipendent
Archivi de Patrie

TERITORI – SLOVENIE. Un popul di schiadôrs

............

DUCJ A SCHIÂ!_ Nêf al vûl dî ancje cjalçâ i scarpons e impirâsi i schîs par provâ la gjonde di butâsi jù des monts. Di simpri i slovens a àn un leam une vore strent cul schiâ: la Federazion di schi de Slovenie (Szs-Smučarska zveza Slovenije, www.sloski.si) e à in dì di vuê 203 circui afiliâts, e ogni an a son plui di doi mil e tresinte di lôr a cjapâ part a garis di ogni sorte, dal schi alpin a chel nordic. Il prin campionât nazionâl, ancje se no uficiâl, al è stât te stagjon 1920-21 a Bohinj; cualchi an dopo, atletis slovens a jerin bielzà presints in ocasion de edizion inaugurâl des Olimpiadis invernâls a Chamonix tal 1924. Tal Novembar dal 1991, subit dopo de indipendence de Slovenie, la Federazion internazionâl di schi e à dât bon acet ae Szs, e za aes Olimpiadis di Albertville tal 1992, i schiadôrs nestris vicins a àn podût competi cu la bandiere dal gnûf stât.
GRANCJ SUCÈS_ Tai ultins trente agns, schiadôrs e schiadoris slovens a àn otignût passe 220 titui a nivel internazionâl, sei tai Zûcs olimpics che tai Campionâts mondiâi e tes Copis dal mont di cualsisei dissipline sportive su la nêf. In particolâr, il schi al è deventât sport nazionâl tacant dai agns Otante dal secul stât: di fat, juste tal Zenâr dal 1980, Bojan Križaj al à vinçût pe Jugoslavie – e duncje pe Slovenie – la prime gare di Cope dal mont di schi alpin, un slalom speciâl a Wengen, in Svuizare. Tai Mondiâi 1982 di Schladming, in Austrie, Križaj al è rivât secont simpri tal speciâl e tal ’87 al à concuistât la Cope di specialitât te sô dissipline preferide.
PRIN AUR OLIMPIC_ Tai agns Otante si son fats cognossi altris schiadôrs slovens. Aes Olimpiadis invernâls di Sarajevo dal 1984 e je rivade la prime medaie jugoslave: ancje in cheste ocasion al è stât protagonist un sloven, Jure Franko, nassût a Nova Gorica tal 1962, che al à cjapât l’arint tal gjigant.
Di chê volte fintremai al dì di vuê, i campions no son mai mancjâts: Rok Petrovicˇ (Cope di slalom speciâl tal 1986, muart inneât a dome 33 agns), Mateja Svet (prime slovene a vinci tal ’86 une prove di Cope dal mont), Špela Pretnar (vincidore de Cope di slalom speciâl tal 2000), Jure Košir (fuart slalomist che al «bataiave» cul so amì Alberto Tomba; bronç tal 1994 aes Olimpiadis di Lillehammer).
MIÔR LIS FEMINIS_ In dì di vuê a fâsi valê di plui e je la rapresentative des schiadoris, tant che Tina Maze, 26 agns, medaie di arint tal slalom gjigant ai Mondiâi 2009 in Val d’Isère: par jê fin cumò vot vitoriis te Cope dal mont.
A «difindi» la part masculine de nazionâl al è Andrei Jerman, 31 agns, prin sloven a vinci une prove di dissese libare te Cope (Fevrâr 2007, Garmisch-Partenkirchen).
NO DOME SCHI…_ I slovens i stan une vore daûr ancje al schi nordic. Petra Majdicˇ, 30 agns di Lubiane, e à vinçût chest an e l’an passât la Cope dal mont tes provis sprint; cun di plui, e pues svantâ un arint tai Mondiâi dal 2007 e in dut 14 vitoriis in cariere.
Concuistâ une Cope dal mont a dome 18 agns di etât e je une cjosse che no capite ducj i dîs… Autôr di cheste imprese al è stât Primož Peterka, che tal 1997 si è imponût te Cope di salt cui schîs, vincint ancje l’an dopo. Magari cussì no, par vie de pression dai mieçs di comunicazion e dai passionâts, Peterka al à vût tai agns dopo une brute crisi e dome di pôc al è tornât a otignî risultâts di un ciert nivel.
Alessio Potocco

Fondazione Friuli / Un jutori concret al mont de scuele in regjon

Piero Cargnelutti
La Fondazione Friuli e comuniche di vê dât fûr il bant dedicât ae istruzion che al podarà contâ suntun font di 600 mil euros e che i progjets si podaran presentâ dentri dai 24 di Març. Il bant al previôt diviers indreçaments tant che il sostegn ae dotazion tecnologjiche, il potenziament des competencis linguistichis, il […] lei di plui +

Gnovis / Diego Navarria al vinç il Premi internazionâl Jacum dai Zeis

Redazion
Il nestri colaboradôr Diego Navarria al à vinçût il Premi internazionâl Jacum dai Zeis cun la conte par furlan “La confession”, insiemit a Rosella Soranzo di Duin cun “Una coppia in incognito”. Il premi al è ideât dal setemanâl Il Friuli in ocasion dai cent agns de muart dal inomenât personaç furlan, e oragnizât in colaborazion cu la Societât Filologjiche Furlane e l’Universitât […] lei di plui +

Pan e salam / Scufiots e trisculis

Enos Costantin
Une roste furlane prime de montane La disfide di BarletePar Marine Le Pen a vegnin prime i francês, par Matteo Salvini a vegnin prime i talians, par Viktor Orbán a vegnin prime i ongjarês.◆ Po ben, par finîle cun cheste naine fasìn une biele disfide. Ju puartìn jù a Barlete ducj i trê, ju sierìn […] lei di plui +