TERITORI – AUSTRIE. La 66e sagre di Vilac e je tornade a sei une fieste record

Il ‘Kirchtag’, ven a stâi ‘la dì de glesie’, al è deventât za la plui grande fieste tradizionâl di dute la Austrie. La fieste e implene cun 15 milions di euros lis cassis carinzianis e e sfulmine plui di 130 mil litris di bire. Impastanade in memorie dal dirit di tignî un  marcjât franc stabilît dal imperadôr Friedrich tal 1225, e ven organizade dal   prin di Avost dal 1936 ogni an a Vilac, in Carinzie. La associazion ‘Villacher Kirchtag’ e organize cheste fieste dal 1966, tacant simpri la prime sabide di Avost, chest an pe 66e volte, dal 26 di Lui ai 2 di Avost.
280.000 visitadôrs a àn fat fieste dute cheste setemane: la atrazion principâl e je stade la procession folcloristiche cui siei 4.000 partecipants vistûts cun costums di dute la Europe.
La crisi globâl no à vude nissune influence sul risultât economic de fieste. La plui grande fieste tradizionâl austriache e je za deventade un tiermin fis. Pal ‘Krügerl’, ven a stâi pal mieç litri di bire, si paie fra 3,00 e 3,50 Euro, alore mancul che no al   Oktoberfest bavarês, dulà il litri (Maß) al ven di 8,30 a 8,60 Euro.
Sul program culinari si cjate ancje la ‘Kirchtagssuppe’, une mignestre tradizionâl che si prepare cun diviersis sortis di cjar e sbrume acide: in dut, si consumin 45.000 litris di cheste delizie locâl. Contents ancje i alberghîrs: dute la regjon di Vilac e je complete, fin al ultin jet. Dut insieme, si calcolin jentradis par 15 milions di euros pe regjon. Il dîs par cent dai visitadôrs al ven de Slovenie; dôs voltis di plui a son chei de Italie, turiscj di Rome e di Milan, e furlans che a cirin contats comerciâi. Al è un fat positîf che al rindarà plui strents i contats tra lis regjons storichementri sûrs di Tarvis, chê slovene di Kranj e chê di Vilac.
JANEZ ERAT