TELEVISION, CINE E TEATRI. La cjançon plui rapresentative

Cuale ise la cjançon plui rapresentative dal Friûl? A cheste domande e à provât a rispuindi la ARLeF, cuntun piçul sondaç spontani organizât su Internet e che al à interessât un centenâr di personis. Ce che e domandave la Agjenzie e jere propit une rispueste “di panze”, cul unic vincul di segnalâ une cjançon dai agns Setante indenant. Sielte no facile te sene musicâl vivarose come chê in lenghe furlane. Sioris e siôrs, ve ca i vincidôrs: “Un soldatin” di Giorgio Ferigo e i Povolâr Ensemble; “Scjaraçule maraçule” te version dai Mitili FLK; “Tu tramontis” te version dai Mitili FLK; “In grava” di Rocco Burtone; “Doman” di Lino Straulino; “El bal dal cosac” dai Arbe Garbe; “Anime femine” di Gigi Maieron; “O ce biel cjiscjel a Udin”, tradizionâl.
Po ben, noaltris o vin sintût a proposit l’etnomusicolic Valter Colle che, daspò di vê metût in clâr il so jessi di part (come che o savìn al è ancje editôr cu la etichete Nota), nus à preparade une cuintriclassifiche. Il prin puest assolût al va a “Tualias” di Andrea Dall’Orbo: «no je tra lis plui cognossudis, ma e je la cjançon plui reinterpretade e forsit la plui preseade dai musiciscj. Il test al è perfet par une rapresentativitât storiche dal Friûl». Secont puest par “Colôrs” dai Mitili Flk e “Doman” di Lino Straulino: «A son tocs durâts tal timp e che a àn segnât il scomençament de gnove musiche furlane sul tacâ dai agns ’90 e a ducj i efiets a puedin jessi considerâts rapresentatîfs dal Friûl di vuê». Par finî cun “Mandi Friûl” di Dario Zampa, «che tai agns de gnove industrie discografiche locâl, al à rapresentât il “gnûf”, distacantsi de tradizion melodiche folkloristiche e vierzint la strade a tantis altris realtâts». Fûr di concors, il premi cualitât al va ai progjets musicâi di Loris Vescovo, «che a son une ricercje musicâl avanzade e personâl. Il lavôr “Sintetiche sincretiche sinaptiche” cui tescj di Stefano Montello, par me al reste la miôr cubie dai ultins timps e il nivel compositîf plui alt de musiche furlane. Ancje se la mê cjançon favoride e je un inedit di Lino Straulino».
Natascia Gargano