TELEVISION, CINE E TEATRI. Babel Film Festival 2011

Che il cine al puedi dâ fuarce a une lenghe e jessi un mieç par doprâ e meti in vore un lengaç: cheste e je la fonde di un festival di promozion dal cine tes lenghis minoritariis che al è stât inmaneât a Casteddu (Sardegne) a partî dal 2010 de “Cineteca Sarda di Cagliari”, de Associazion culturâl “Babel” e de societât di produzion audiovisive “Areavisuale”, in colaborazion cu la Federazion taliane “Circoli del Cinema”, la NUCT (Scuele Internazionâl di Cine e Television di Cinecittà), Cinemecum.it (Associazion “Cagliari in Corto”) e cul jutori di tancj Ents che a lavorin te suaze des minorancis.
Tra i sogjets tirâts dongje a son, dal Friûl, Radio Onde Furlane e il CEC, Centri Espressions Cinematografichis.
Il Babel Film Festival al è rivât cumò ae sô seconde edizion e al à bandît un concors, dividût in  cuatri sezions (lunc metraç, curt metraç, documentari, videoclip), là che l’unic dovê al è chel di fâ un lavôr intune lenghe minoritarie.
L’an passât si è davuelt in cinc parts: une di proiezion dai film in concors, une par viodi lis oparis fûr gare, une par incuintrâ regjiscj innomenâts, une par discori su cuistions de tutele juridiche des minorancis, une sui rapuarts de musiche e dal teatri cun lis lenghis minoritariis.
Ben setantecuatri a son stâts i film in gare, proietâts cui sottitui par talian e inglês.
E il Friûl si è pardabon fat onôr te disfide, stant che il vincidôr dal Premi “Maestrâl” al è stât il documentari “Rumore bianco” di Alberto Fasulo, un zovin origjinari di Sant Vît che al à mostrât il Tiliment, cjapant dentri ducj i Comuns che a stan su lis sôs rivis e lassant fevelâ in plene spontaneitât sedi la umanitât che e vîf dongje dal flum sedi il flum stes.
Al concors 2010, tra i furlans, e jere ancje Christiane Rorato, fie di pari furlan e mari francese, che e à puartât in gare il documentari “Vuerîrs de gnot”, contant la storie dai Benandants, oms mistereôs e magjics che, seont la tradizion, a scombatin di agnorums cuintri il mal intune tiere che, a sô volte, e scombat par difindi la sô identitât.
Cui sarano i partecipants furlans pe edizion 2011 dal Babel Film Festival? Ancjemò no si sa, ma la scjadince par fâ domande e je segnade ai 31 di Avost dal 2011. Par dutis lis informazions sul Festival, fracait su www.babelfilmfestival.com.
Ilarie Colùs