Biel che il Friûl al jere proietât ai 15 di Setembar, cuant che si varès memoreât la seconde grande scosse di cuarante agns za fa che, dopo chê disastrose dai 6 di Mai, e segnâ la sperance dai furlans ma ancje e fo fondamentâl par impastanâ une ricostruzion rigorose dal pont di viste de anti sismicitât, la Italie e cun jê i furlans ai 24 di Avost a an scugnût vaî altri 295 muarts cause l’Orcolat e viodi paîs ridots a un grum di rudinaçs.
Sul cricâ dal dì di chê zornade, a lis 3.36 di matine, su la crosere tra Umbrie, Lazi e Marche e je rivade une scosse di magnitudo 6 grâts de scjale Richter e trê paîs in particolâr, Amatrice e Accumoli in provincie di Rieti e Arquata del Tronto in provincie di Ascoli Piceno a son sdramassât jù.
Par il Friûl une gnove e fuarte prove emotive, par vie che al è come se 40 agns no fossin passât. E invezit a son passât par cont de capacitât di organizâ il socors te emergjence e tal coordenament di tantis fuarcis che a an di jessi mobilitadis bot e sclop e cun professionalitâts diferentis.
Si è viodût ancje in chê dì. La Protezion civîl di Rome e à “butât ju dal jet” chê dal Friûl a lis 4 di buinore, duncje nancje vincj minûts dopo che al jere sucedût il montafin in chescj paisuts sul Apenin, dulà che il plui grant al à su par ju 2.600 animis sparniçadis in 69 borgadis (Amatrice) e che si cjatin tra i 700 e i 100 metris di altece.
La rispueste de Protezion civîl regjonâl e je stade imediade: a lis 9 di buinore al jere bielzà in svol un elicotar cun dôs scuadris dal socors alpin compagnadis dai cjans par cirî la int tra lis maseriis e cu lis machinis a son partîts subit un trop di tecnics par preparâ il teren ai volontaris che, dal subit, si ere capît che a vevin di lâ là jù.
No jere nancje finide la buinore dai 25 di Avost, che te centrâl de Protezion civîl a Palme a jerin pronts in 70 volontaris, rivâts di 19 Comuns, e dut ce che al coventave par meti in pins une tendopoli cun 250 puescj completementri autonome, ven a stâi sedi di corint, di lûs, di aghe, par fâ di mangjâ e par dâ dut ce che al covente a chei che a jerin di sotetâ. Tant par dâ une idee, a misdì di chê zornade a jerin pronts sul plaçâl 12 bilics.
Rome e à destinât la fuarce dal Friûl tal puest plui martorât, Amatrice, il paîs che al à vût passe dusinte muarts dome lui. Te buinore dal 26 di Avost, i volontaris a jerin bielzà in vore subit fûr dal paîs par fâ su il cjamp Friûl, e a misdì di chê zornade i alpins a vevin ancje bielzà provade la cusine cu la pastesute par i tancj socoridôrs che a jerin in vore.
Metude in vore la tendopoli (la seconde jevade su, dopo chê des regjons Lazio e Marche), dulà che an cjatât tet la int ma ancje chei che a son alì par judâ, il Friûl si è cjapât la incarghe di altris doi intervents un grum impuartants: i rilêfs topografics par mieç di un elicotar e di tecnologjie moderne; il coordenament par la costruzion di un vât sul flum che al passe dongje Amatrice, par vie che lis scossis a an rindût inagjibil il puint che al coleghe il paîs cu la strade principâl che e puarte a L’Aquila e duncje i mieçs di socors no podevin nancje plui rivâ cence fâ un zîr cetant lunc par lis stradis di mont.
Par la tendopoli e i rilêfs topografics la Regjon e à metût subit 500mil euros e a chest cont e à zontât subit dopo altris 200mil euros che a jerin chei che a varessin vût di cuvierzi lis spesis par la grande esercitazion internazionâl di Protezion civîl (ancje cun Slovenie e Austrie) che si ere metude in lunari dai 15 ai 18 di Setembar, propit par memoreâ in forme costrutive la seconde grande scjassade di 40 agns za fa.
I rilêf topografics, che si fasin cuntune strumentazion che dome la Protezion civîl FV-J e à, a son impuartantons par cuant che si varà di tornâ a fâ su. Cun di fat, i risultâts a saran consegnâts al Dipartiment nazionâl e ai sindics. Di marcâ ancje il rûl dal Friûl tal risolvi il probleme dal puint inagjibil midiant un vât, tant che a son stâts i tecnics FV-J a coordenâ i lavôrs dal Gjeni militâr e di altris fuarcis; il materiâl in nancje 24 oris al è stât furnît di une dite furlane.
La presince dai volontaris: sul principi a jerin 120, e je cumò di une trentine di unitâts che si dal il turni ogni setemane. ❚
✒ Antonella Lanfrit
______________________________________
Cemût judâ
Par chel che al rivuarde il jutori dai citadins ai taremotâts, la Protezion civîl dal Friûl-Vignesie Julie e met a disposizion il so cont corint, alì dal Unicredit, intestât a Tesorarie regjonâl pe protezion civîl (Iban: IT47 W 02008 02230 000003120964). Al è di meti la causâl Sisma centro Italia-il Friuli Venezia Giulia non dimentica. I bêcs a saran doprâts «par fâ un o plui di un intervent di publiche utilitât», e sigure sul sô sît web la Protezion civîl F-VJ. Une altre iniziative inmaneade e je chê de Glesie: domenie ai 18 di Setembar, colete in dutis lis messis, par progjets che a cjalin all’avignî di chei paîs. La diocesi di Udin e zonte lis ocasion di racolte cu lis seradis dal spetacul Dì speranza. La prossime ai 24 di Setembar a Glemone. ❚ ✒ A.L.
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +