Sfuei Mensîl Furlan Indipendent
Archivi de Patrie

«Tal mont de informazion in rêt la croniche e vinç su dut»

Dree Venier
Nicola Angeli

Interviste cun Nicola Angeli, il responsabil dal sît di informazion gratuite Udine Today, in Friûl un dai plui consultâts su internet par informâsi

Nicola Angeli, di Narêt di Prât, al è il responsabil dai sîts informatîfs sot de marche “Today” de regjon: Udine Today, Trieste Prima, e ancje Treviso Today. Ducj sîts di informazion nassûts su internet e cun acès libar, sore nuie. Classe 1978, o ai volût sintîlu, incuriosît di cheste realtât che e je deventade cetant impuartante par cui che si informe in rêt in Friûl.
_
Nicola, ce studis âstu fat?
Il Zanon a Udin e dopo mi soi laureât in jurisprudence a Triest, cul ordenament vecjo, di cinc agns. Finîts i studis no ai cjapade la cariere juridiche parcè che no je mai stade la mê intenzion: chei di jurisprudence a jerin studis che o pensavi che mi podevin plasê, e dopo o volevi sfidâmi a frontâ une robe serie e dificile. Duncje dopo o ai pontât a insegnâ. Par un periodi o ai insegnât, fin a rivâ a jessi coordenadôr intune scuele privade di recupar dai agns scolastics. Dut câs, studiâ jurisprudence mi à judât ancje te cariere gjornalistiche. E stâ a Triest, a fâ il diretôr di triesteprima.it, il nestri sît su Triest. Une citât che mi è plasude tant: dopo i studis o sarès restât vulintîr. Di fat, in redazion a Trieste Prima mi clamin “il plui triestin dai furlans” (al rît, ndr).
_
Duncje, al gjornalisim cemût sêstu rivât?
Par câs. A mi mi plâs tant il balon, e di zuiadôr o ai balinât sù e jù pes categoriis bassis: in Tierce, Seconde e vie indevant. No jeri bravonon ma une vore apassionât dal zûc, tant che mi plaseve lâ ator a viodi lis partidis di chês altris scuadris o dai amîs, a pene che o podevi. A un ciert pont mi àn domandât di scrivi cualchi croniche di partide. Dopo vê tacât cun chel, o ai scuviert che scrivint di musiche e spetacui tu podevis vê i incredits par lâ ai concierts gratis e o ai fat ancje chei: il sburt nol è masse nobil ma al è cussì (al rît, ndr). Po dopo o ai smicjât a vê l’incredit par viodi l’Udin e duncje a scrivi di chel… e vie indevant.
_
E cemût sêstu rivât a Udine Today?
O ai rispuindût a un anunzi cjatât sul web, li che si diseve che une societât editoriâl e cirive gjornaliscj sul Friûl. O ai mandât il curriculum, e cuant che mi àn convocât in sede par fâmi il colocui paiantmi il biliet, o ai tacât a pensâ che e jere une robe serie. La sede e jere a Milan (une e je ancje a Rome), lôr a jerin chei dai sîts marcâts “Today” che a son in dute Italie e che a vegnin fûr de esperience di studenti.it, che e je stade une realtât tant grande dal web talian. Fat il colocui mi àn assunt e o ai tacât a vierzi il “Today” di Udin: udinetoday.it. Cumò o soi diretôr responsabil di chel, di triesteprima.it e di trevisotoday.it, parcè che par solit un diretôr al sta daûr a trê testadis. O speri che o rivarìn a vierzi chê di Pordenon e cussì mi gjavin Trevîs, che di chês zonis no sai trop.
_
Trops sêso a fâ il sît?
O sin in cinc, fra cui che al è a timp plen e i colaboradôrs. La maiorance a son feminis, cun “agi e disagi conseguenti” (al rît, ndr). Ancje in chel o sin ae avanvuardie.
_
Cualis sono lis robis che a funzionin di plui su Udine Today?
La croniche. Al è pôc ce fâ: la croniche e vinç su dut. La int e je atirade, come che cuant al è un incident ducj si fermin par cjalâ. Po dopo o vin une pagjine su ce fâ tal fin setemane che e va ben, e je seguide e nus fasin i compliments.
_
Isal cualchi personaç furlan che al va di plui? Cualchidun di locâl?
No, ti dîs la veretât. Fale Taylor Mega, se tu vuelis considerâle cussì: chê e puarte simpri visitadôrs. Ma no si pues nancje considerâ un personaç locâl. Magari cussì no, a àn sucès i personaçs che a ogni mût a àn il “ricognossiment” di jessi personaçs “nazionâi”.
_
No mi pâr che o fasês nuie in lenghe furlane. Isal un diktat de sede centrâl?
No, nissun diktat. Par dî il vêr no ai mai proponût la robe, e duncje no sai ce acet che e podarès vê. Si podarès provâ…
_
A proposit di furlan, tu colaboris ancje cu la Rai par “Vuê o fevelìn di…” la trasmission in lenghe furlane di Rai F-VG.
Li mi à tirât dentri Enrico Turloni di Onde Furlane, un altri gjornalist sportîf. E je stade la prime volte che o ai fat gjornalisim par furlan. Une biele esperience, ancje se cumò o stoi fasint altri, simpri par furlan e pe Rai: il program Sportiami che al fevele di chei “altris” sports, di là dal balon. Tant par cambiâ, dopo o tornarai ancje a “Vuê o fevelìn di…”.
_
Tu colaboris ancje cun la Gazzetta dello Sport: par un apassionât di balon come te al sarà une biele gjonde!
Sì, mi divertìs tant parcè che al è un lavôr plui creatîf: scuasit ogni dì o ai di contâ un fat curiôs, une storie. Mi àn domandât di colaborâ lôr, o ai provât, e a son contents: un sium di piçul che si è realizât. Anzit forsit no lu vevi mai nancje olsât fâ.
_
Tu tu sês ae vuide di un gnûf media nassût cun internet. Cemût viodistu il panorame de informazion dal gjornalisim vuê? Partìn de cjarte stampade…
Par me la cjarte stampade e esistarà simpri e mi plâs une vore, tal dîs de mê posizion che e je di dute une altre bande (mi cimie, ndr). Però chel che al è di cambiâ a son i gjornaliscj e i editôrs, a ’nd è ancjemò masse cu la vecje mentalitât; par esempli par me su cjarte tu âs di fâ biei servizis luncs di aprofondiment, contâ storiis, tignî li il letôr cuntune robe speciâl. Sul web magari la robe plui svelte, su la cjarte chê plui interessante. Ma cheste e je dome une des cuistions; come che ti dîs, e je dute une mentalitât che e larès cambiade.
__
E ce pensistu de gnove tindince dai articui a paiament, tu che tu sês responsabil di une testade gratuite?
Le viôt une sielte che e podarès jessi valide. Forsit la int no je propit pronte, ma si usarà: il fat di vê articui a paiament i da lustri ae testade, soredut par un ciert public plui “alt”. Di fat jo o ai domandât ae sede centrâl di podê fâ cualchi toc a paiament, ma par nô dai “Today” al è dificil cambiâ un sisteme e duncje dal sigûr no si fasarà in curt. Une robe che ancje le capìs: ogni modifiche si à di pensâ che dopo e à di jessi fate par ducj, che dopo ognidun le fâs te sô maniere, che ducj a varessin di jessi in stât di produsi alc di plui profont… Però, o ripet, a mi mi atirarès. ❚

:::::::::::::::::::::::::::::::::::::::::::::::::::::::::::::::::::::::::::::::::::::::::::::::::

FOCUS. I sîts di informazion nassûts in rêt, in Friûl


A son in tancj che a àn cirût di concuistâsi une posizion impuartante tal panorame de informazion furlane di là dai sîts dai media che a jerin za. Ven a stâi chei dai cuotidians Gazzetino, Messaggero Veneto e Piccolo (lu citìn parcè che al cure tant il gurizan), chei dai setemanâi tant che Il Friuli o La Vita Cattolica, des televisions tant che Telefriuli o Video Tele Carnia, e des radio (li che chel di Radio Studio Nord, studionord.news, nus pâr che al fasi un biel lavôr pe mont). O volìn fevelâ di chei nassûts di pueste su internet, che magari a àn provât a aprofitâ dal fat che a coventavin pôcs bêçs par fâ sù un sît e rivâ cussì a imponisi tant che alternatîf. Il principâl in Friûl cumò al somearès jessi Udine Today, che però al fâs part di un grup. Tai ultins timps si è fat indevant cuntune biele presince e tancj contignûts friulioggi.it. Ben atîfs ancje pordenoneoggi.it e Diario di Udine/Diario FVG diariofvg.it. Plui di nicje e ideologjic al è friulisera.it. Al à vût timps miôr Udine20, sît su Udin e provincie, che cumò al va indevant un tic cul flât a grops. Dut un discors al meretarès chel dai sîts di sport, un setôr che al fâs simpri numars impuartants.
◆ Un panorame che dut câs al è tant dificil di monitorâ, stant che al è simpri in moviment. O sierìn ricuardant che dentri di ducj chescj competidôrs al è rivât il sît gnûf dal nestri mensîl, lapatriedalfriul.org, e duncje us invidìn a lâ a dâ un cuc li prin di dut. ❚

LINK & LEAMS

Si pues lâ a viodi il lavôr di Nicola Angeli e dai siei colaboradôrs sul sît www.udinetoday.it, e nus àn spiât che in curt al rivarà ancje www.pordenonetoday.it

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +