Suns Europe si svicine. E al rive ancje Suns Ladinia

E va dilunc la marcje di svicinament viers de seconde edizion di Suns Europe, il Festival european des arts performativis tes lenghis minoritariis che cun chel, tra la fin di Novembar e i prins di Dicembar di chest an, Udin e Friûl a tornaran a jessi il cûr de Europe de diversitât linguistiche e de creativitât.
La scree dal sît internet gnûf, il rinovament de pagjine Facebook e il lanç dal avîs pe partecipazion a àn metût in moviment tancj di lôr che tai cjamps de musiche, dal audiovisîf e de leterature a son espression vivarose des lenghis e des culturis des minorancis e des nazions cence stât.
Al jere timp fintremai ai prins di Otubar par fâ indenant propuestis e candidaturis. Dentri de metât di chest mês si cognossaran i nons dai protagoniscj de manifestazion, metude adun cul jutori de ARLeF, cul coordenament de cooperative Informazione Friulana e cu la colaborazion di une schirie di sogjets e istituzions dal Friûl e dal rest de Europe.
Par intant a van indenant ancje i preparatîfs di Suns Ladinia. La preselezion “live” – par grups e soliscj di chê part dal continent european che si cjate dentri des Alps e dal Mediterani – de sezion di Suns Europe dedicade ae musiche. La serade si fasarà ai 19 di Novembar a Moena, te Val di Fasse, e si scomence bielzà a savê alc di plui ancje in cont di chel apontament, inmaneât cul  coordenament de associazion La Grenz cu la poie des istituzions di chenti, a tacâ de Provincie autonome di Trent e de Regjon autonomie Trentin-SüdTriol.
La direzion artistiche e je par cure di Enrico Tommasini,  musicist implicât di tancj agns in diviers progjets e par chel une vore cognossût ancje fûr de Ladinie e dal Trentin e la conduzion de serade, che si le fasarà tal Teatri Navalge di Moena, e sarà par cure dal atôr e animadôr furlan Michele Polo e de cjantautore fassane Martina Iori.
Intant ancje di Sanremo e rive une altre conferme de cualitât dai artiscj che in chescj agns a son stâts coinvolzûts dentri di Suns e Suns Europe. Inte suaze dal Premi Tenco il premi par l’album miôr in lenghe minoritarie o par dialet al è lât a Claudia Crabuzza, vincidore de edizion dal 2012 di Suns (viôt a pagjine 10, ndr). ❚
✒ Marco Stolfo