MUSICHE. “Suns” 2014 a fevelin par ladin

Si clame Martina Iori e e à dome 18 agns. E je jê la zovine cjantautore de Val di Fasse, in Trentin, che e à puartât a cjase il prin puest a Suns 2014, il Festival de cjançon in lenghe minoritarie de Europe, inmaneât di Radio Onde Furlane e dal Progjet Suns cul jutori de ARLeF (Agjenzie Regjonâl pe Lenghe Furlane), che si è tignût li dal Teatri Palamostre a Udin il mês passât. Martina e studie il violin al conservatori di Bolzan e tal timp libar e scrîf cjançons. Il test e la melodie dal so toc in lenghe ladine “Via con mia musega” a corin vie cuntune naturalece di incjant. Il public e la jurie a àn preseât la sô vôs frescje e elegante e la sô capacitât stilistiche e emozionâl. Cun jê, che e cjante e e sune la ghitare, a jerin ancje Marco Stagni al liron, Enrico Tommasini ae batarie e Roberto Dassala ae ghitare. Il premi ju puarte di dirit a Oldenburg, inte Basse Sassonie, pe finâl continentâl dal Liet International 2014 (ai 12 di Dicembar). La segnalazion pe miôr performance dal vîf e je lade invezit ai sarts Ratapignata, pe lôr tignude dal palc cun snait e energjie, daûr di une esperience di passe cuindis agns di ativitât. Tra i vot grups in concors, nuie ce fâ invezit pai nestris Elsa Martin che cun Marco Bianchi e à presentât il so toc “Cjante”, vincidôr dal premi de critiche “Bianca d’Aponte” (ricognossiment a nivel talian dedicât al cjantautorât feminin), e Aldo Sbadiglio e la Famiglia Ananas in Vacanza a Dresda, vincidôrs dal Premi Friûl 2013, che a àn di pôc dât fûr il lôr gnûf album “Ljuba Toast Cricket Club” cu la etichete Musiche Furlane Fuarte. La serade e je stade movimentade ancje di un omaç aes lidrîs dal hip hop par furlan cul toc “La ligrie e ven dai zovins”, interpretât dai rappers Passion e Tubet, cul jutori de sezion ritmiche dai coleghis sarts Forefingers Up!, che a àn vinçût la edizion passade di Suns e che duncje a son finaliscj di dirit al Liet. «Suns al conferme di une bande che la musiche e je in stât di dâur valôr aes lenghis minoritariis, soredut tra i zovins» al à comentât il president de ARLeF Lorenzo Fabbro «e di chê altre che lenghis e creativitât a son une pussibilitât privilegjade che al à il Friûl par vê a ce fâ cul mont». Pussibilitât mostrade ancje la dì dopo, cul conciert di Loris Vescovo – inmaneât in gracie de colaborazion tra Progjet Suns e Euritmica e tra Suns, Musiche* e Note Nuove – che al à presentât dal vîf il so ultin cd “Penisolâti”, vincidôr dal prestigjôs ricognossiment talian “Targa Tenco” 2014. ❚
Natascia Gargano