Inte interviste publicade su “La Patrie dal Friûl” di Jugn, l’assessôr regjonâl cu la deleghe aes Minorancis linguistichis Pierpaolo Roberti si è declarât contrari ae domande di competencis linguistichis par furlan, sloven e todesc ai candidâts intai concors publics dal compart unic: «Une misure che e podarès jessi calcolade discriminatorie», al à dit. Ma isal pardabon cussì?
No son passadis sot vie lis peraulis pronunziadis dal assessôr regjonâl aes Minorancis linguistichis, inte interviste publicade su la La Patrie dal Friûl di Jugn, li che Pierpaolo Roberti si è declarât contrari ae domande di competencis linguistichis par furlan, sloven e todesc ai candidâts intai concors publics dal compart unic: «Cheste e je une misure che e podarès jessi calcolade discriminatorie viers di cui che nol fevele il furlan», al à afermât.
Ma isal pardabon chest pericul di discriminazion? Cemût si risolvial il probleme in chês altris regjons europeanis che a son similis al Friûl in teme di multilinguisim e multiculturalitât? Us volìn presentâ trê câs significatîfs là che la lenghe minoritarie e devente carateristiche impressindibile (no dome acessorie, ma obligatorie) par cui che al aspire a un implei public.
__
Il patentin di bilinguisim in Sudtirôl
La cognossince de lenghe todescje e taliane (ancje di chê ladine intai comuns di insediament) e je fondamentâl par cualsisedi che al aspiri a un implei public in Sudtirôl, sedi intai uficis dai ents locâi (Regjon, Provincie e Comuns) sedi inte sanitât, inte justizie, intes fuarcis armadis e dal ordin, e intes aziendis concessionariis di servizi public. Il nivel linguistic par talian e todesc al ven certificât di 41 agns cu la consegne, dopo l’esam, di un patentin di bilinguisim de bande de Provincie autonome di Bolzan. L’an passât, celebrant il cuarantenâl, il president Arno Kompatscher al à definît il patentin «une colone de nestre autonomie», «l’istitût che in graciis di chel ogni citadin al esercite il dirit di doprâ la proprie marilenghe intai rapuarts cu lis istituzions». L’esam al è gratuit ad implen, si fâs a Bolzan ogni dì di vore (e, se no si lu passe, si pues tornâ a fâ infinidis voltis) e al ven frontât in medie di 13 mil citadins ogni an.
__
Miedis e infermîrs tes Isulis Baleârs «Doi agns par imparâ il catalan. O ti licenzi!»
Une ispirazion interessante e ven de rispueste che Sergio Cecotti, in vieste di candidât ae presidence de Regjon Friûl-Vignesie Julie aes elezions resintis, al à dât al cuistionari promovût dal Comitât 482 propit sul teme de valorizazion des lenghis minoritariis ancje intal implei public: «Une leç resinte dal Parlament des Isulis Baleârs pe introduzion dal catalan te sanitât publiche e presente un model interessant. Cuant che un al fâs domande pal concors a miedi o infermîr al à di impegnâsi a sostignî dentri di doi agns de assunzion un esam pal conseguiment di un certificât basic de cognossince dal catalan; se nol rive a superâ l’esam dentri doi agns, al piert il puest. In altris peraulis, un al pues ancje no savê il catalan, ma al è obleât a imparâlu dentri di un timp stabilît, se no al ven licenziât. Al è un mecanisim che al supere la eventuâl censure di incostituzionalitât di domandâ la cognossince de lenghe tant che prerecuisît par partecipâ al concors (ma che simpri al scoragje int di fûr a partecipâ)».
__
In Slovenie, talian e ongjarês intai concors publics
Pôcs lu san, ma par cjatâ un dai “paradîs” europeans des minorancis linguistichis no bisugne fâ tancj chilometris: e je la Slovenie, dulà che il status des minorancis taliane e ongjarese al è garantît de Costituzion cuntune ecuiparazion totâl ae lenghe uficiâl slovene intai teritoris di insediament.
Su la situazion intai comuns bilengâi di Koper/Cjaudistrie, Izola/Isule di Istrie e Piran-Portorož/Piran-Portorose o vin interpelade la Comunitât autogjestide de nazionalitât taliane di Cjaudistrie (Can).
«Chi, cui che al vûl candidâsi a un puest di vore intal setôr public al à di cognossi ancje la lenghe taliane – al sclarìs il segretari de Can, Claudio Geissa –. No dal sigûr par ducj i puescj, parcè che inte plante organiche a vegnin individuadis lis posizions di vore là che al covente aplicâ il bilinguisim. Ma chestis a son la grande part, pes dibisugnis di contat cul public e di redazion di ats bilengâi, specie intai setôrs de justizie, de aministrazion publiche e de sanitât. Se il candidât nol à otignût il titul di studi domandât intune scuele taliane, al à di produsi une certificazion linguistiche ricognossude».
Ducj i citadins dai comuns bilengâi li che a vivin lis minorancis taliane e ongjarese a àn di fat il dirit di indreçâsi ae aministrazion publiche, intes relazions verbâls e in ducj i ats uficiâi, inte proprie lenghe mari. Ancje i ents publics a àn di scrivi i propris ats uficiâi e lis comunicazions pe gjeneralitât de popolazion sedi par sloven che inte lenghe minoritarie. Intes manifestazions publichis, i intervents e lis presentazions a àn di jessi fats in dutis dôs lis lenghis.
«Intal setôr privât – al sclarìs Geissa – nol è invezit l’oblic di assunzion di personâl bilengâl, ma lis scritis des ditis a àn di jessi bilengâls, insiemi cun dute la documentazion esponude al public». Si pues po dopo verificâ cun facilitât cemût che, sedi intes piçulis buteghis come pûr intes grandis cjadenis comerciâls, inte Istrie slovene al è normâl podê indreçâsi cun trancuilitât par talian ai comès. Ancje intai câs là che e je palese la no apartignince ae minorance, e je simpri une capacitât e une volontât di vignî incuintri al client che al fevele par talian.
Sono mai ricors par discriminazion? Tant sporadics, e dome de bande di personis de minorance taliane cuintri de mancjade aplicazion de leç: «L’ultin câs al à rivuardât la Cjase de sanitât di Isule di Istrie, che no veve metût la cognossince dal talian intal bant di concors, e chest al à causât un ricors – al sclarìs Geissa –. In gjenar, la leç e ven rispietade, massime inte capacitât di fevelâ talian al public, un pôc mancul pal bilinguisim visîf. Di chê altre bande, chestis normis a son dirits acuisîts fin de epoche de Jugoslavie, ancjemò prime de indipendence slovene». ❚
Roberto Pensa
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +
Int di Cjargne / “La gallinella saggia” che a Cjavaç e insegne a produsi e a mangjâ ben
Marta Vezzi
La aziende agricule biologjiche La Gallinella Saggia e je nassude 7-8 agns indaûr: “La idee e je stade di mê mari – e conte Caterina Pillinini – che e à simpri fat orts e cjamps, e duncje e je une vite che si dediche ae coltivazions di tancj prodots; vint il ristorant Borgo Poscolle e […] lei di plui +