“In Ingletiere, intai Stâts Unîts e tai paîs de Europe dal Nort e je une materie di scuele dute par so cont: le clamin “digital literacy”, ven a stai “alfabetizazion digjitâl”. Si trate de educazion dai fruts e dai fantats che a imparin a doprâ cun cussience e i gnûfs imprescj di comunicazion, dal computer ai telefonins. In Italie, e ancje in Friûl, su chest teren o sin indaûr ma a son câs di ecelence che a lavorin par judâ i plui zovins a jessi plui atents aes trapulis che a cjatin su la rêt. Si trate de Associazion Mec che di agns a davuelç intervents tes scuelis e che intai ultins doi agns e à prontât adun cu la scuele medie di Maian un progjet speciâl: la atribuzion a ducj i arlêfs des classis primis dal patentin par doprâ il smartphone. I students di Maian, contentons di cheste ativitât che ju à viodûts protagoniscj, a àn fat un percors di 10 oris su 5 temis di grande impuartance: de sigurece informatiche ai dirits e aes responsabilitâts intes relazions online, lis “emozions digjitâls”, cemût informâsi in maniere corete su internet e la dipendence dal telefonin. Par ognidun di chescj temis a àn davuelstis ativitâts ancje a cjase e provis di comprension e di valutazion dai contignûts. Il Patentin, cuindi, al è il risultât de frecuence di un percors di formazion su oportunitâts e risis dai social network, che al clame i docents e i gjenitôrs a dialogâ cui fantats intune sfide educative une vore biele e necessarie. Ancje par chest la iniziative de associazion Mec e je sostignude de Regjon e de Fondazion Friuli e si slargjarà a cincuante istitûts comprensîfs di chenti.
◆ Ae consegne dal Patentin a jerin presints Giacomo Trevisan, coordenadôr di Mec, e lis insegnantis de scuele medie che a àn disvilupât il progjet: Eugenia Lazzarolli, Elisabetta Rossi, Paola Tarantelli, Mariagrazia Molaro (referente pe prevenzion dal Bulisim) e Fiorella Floramo, delegade dal dirigjent Francesco Candido.” ❚
Students “patentâts” in culture digjitâl
