Shoah furlane
Ancje il Friûl teatri de persecuzion antisemitiche
“E je legjitime la difese cuintri i ebreus, che a son masse numerôs, a ocupin un puest privilegjât te vite aministrative, sociâl e economiche dal Paîs. In plui, su di lôr e clope une maledizion antighe, che e podarès coinvolzi ancje il nestri popul, cussì difarent par raze, culture, identitât e religjon”. Cussì al baie il “Popolo del Friuli”, tal Setembar dal 1938. La crisi discjadenade tal 1929 e veve scjafoiadis te miserie plui nere Americhe e Europe.
CJOCHE NAZIONALISTICHE_L’imperatîf, morâl e categoric, al devente chel di fâ di bessôi. Rangjâsi insome, cence domandâ nuie a di nissun. E de Cjargne fin te Basse, al somee di sintî ancjemò la ridade amare dai furlans che – par necessitât plui che par diretive politiche – autarchics a son simpri stâts, secul par secul, voltant plui voltis la gjachete buine dal barbe par che le dopri il nevôt, e soterant i muarts discolçs parcè che lis scarpis a puedin simpri tonâ buinis pai vîfs. E il bocon de polente si lu masane cualchi alc jenfri la man, prime di mangjâlu: migo par disfredâlu po, ma par che al cjapi almancul un tic di savôr di salât, tacât te man sudade di tiere e di fadie, stant che il sâl al coste masse sul marcjât. E intant che la cinturie si strenç stiçant fûr dute la inventive e la straordenarie inteligjence dai puars, lis sgrifis de Italie si slungjin fin in Abissinie. A son 14.000 i furlans che si trasferissin là vie tra il 1935 e il 1936. La lôr lavoranzie e torne comude par fâ sù la plui alte strade mai fate, colegament di prin ordin tra il puart di Massaua e la citât di Asmara: une struture servide ancje di une ferovie che i cor dongje e di une teleferiche par rivâ adore a puartâ sù materiâi fin ae altece di 2.356 metris sul nivel dal mâr. Intant, di Tumieç a Udin, di Cividât a Pordenon, tes placis si disponin lis urnis là che i nuviçs a puedin lassâ colâ dentri la lôr vere di aur, stant che la Italie e à dibisugne ancje di chel sacrifici, in viste de gnove campagne militâr “Dona la tua Fede alla Patria”.
EBREUS TE STORIE DAL FRIÛL_Di dute cheste cjoche nazionaliste, il 1938 al somee une sintesi tragjiche e spaventose, che e bat ancje il destin di tancj furlans ebreus, dissendents di fameis che a vivin te Patrie dal Friûl di centenârs di agns. Comunitâts che a àn prosperât a Udin, Cividât, Sant Denêl, Sant Vît dal Tiliment, Gurize, cu la benedizion dai grancj Patriarcjis de Ete di Mieç, che ur vevin concedût universitâts par studiâ, templis par preâ, cimitieris par polsâ tal sium de muart, e soredut la pussibilitât di une vite libare, cualchi volte ancje prestigjose, dal sigûr mai discriminade. Câs unic in Europe! Miedis, avocats, financîrs, professôrs, ma ancje negoziants, operaris, impiegâts, int puare o siore come ducj chei altris. Autarchics ancje lôr in timps di crisi, si passin cui furlans, chei cristians, la cjalderie par preparâ la polente che come gustâ no contraste di un “et” cu la leç di Mosè. Dal dut inserîts te vite furlane, a fevelin furlan, i robin adiriture cualchi peraule che e finìs tal maraveôs e musicâl cjalderon dal yiddish, la lenghe dal esili. “Polente” e je une di chestis peraulis.
A condividin glorie e miserie di une Tiere che a contribuissin a fâ grande e prosperose. A muerin tes trinceis. A partissin migrants insieme cun ducj chei altris.
VITIMIS DAL FASSISIM_Cualchidun al è plui innomenât, tant che il baron Elio Morpurgo, classe 1858. Sindic di Udin dal 1889 al 1895, deputât pal coleç di Cividât fin al 1919 e senatôr dal Ream tal 1920. A nuie i valarà la iscrizion al Partît Nazionâl Fassist, stant che tal 1938 al pierdarà come ducj i ebreus ogni dirit di om e di libar citadin. Plui tart, tal 1944, cuant che aromai al varà 85 agns, strissinât jù a fuarce de sô carocele tal Ospedâl di Udin, nol rivarà nancje tal cjamp di concentrament là che al jere stât destinât. Il so cuarp cence vite, butât jù dal tren in corse, nol sarà mai plui cjatât. E chei altris? A son tancj, pal plui int “normâl”, cence nomee ni fame: di lôr a restaran lis scarpis, i ocjai, i libris, lis borsetis, lis valîs e i cjavei bandonâts di cualchi bande. Il rest al deventarà cinise butade tal aiarat dal deceni che al vignarà: Gino, Leone e Roberto Jona di Udin, Elvira Schönfeld e Amalia Piccoli di Cividât, Vittorio Samuele, Emilia Pincherle e Olga Lopez Perera di Glemone, Arrigo Bernau di Vile Santine, Vittoria Melli di Aquilee, Marco Basso e Lina Perla Leonzini di Sant Zorç, Armando Bolaffio e Giuseppina Pincherle di Porpêt, Zoltan Trotzer di Sant Vît dal Tiliment, Stefania Goldschmidt di Codroip, Angela Cameo di Pordenon. Juste par fâ cualchi non. Int. Voi, musis, mans. Ancje la famee Szörényi e veve cjatade ospitalitât a Sant Denêl, scjampant de Ongjarie, là che i fassiscj a jerin particolarmentri dispietâts. Il cimitieri dai ebreus dongje dal lât, costruît tal ‘700, la biele sinagoghe in place, la buine nomee dal paîs, ur vevin fat sperâ ben. Ma cualchidun al à fate la spie, fasint valê lis leçs dal ’38. Tradîts. Depuartâts tal 1944 a Auschwitz. A son tornâts dome in doi di lôr, ven a stâi Alessandro e Arianna. Doi fruts furlans ebreus scjampâts al orôr par visânus che cuintri il mâl dal nazionalisim e de presunzion de raze nol esist ni vacine ni cure.
Autarchie tra bonifichis, colonizazions e leçs raziâls
La peraule di ordin dal deceni e je “Autarchie”. Cussì la Italie Fassiste e scree la gnove politiche economiche, a dispiet di ogni crisi mondiâl. E ancje i Furlans si inzegnin a produsi in cjase ce che ur covente. Come se ca sù di nô e fos une novitât! Simbul dal sucès di cheste politiche, Primo Carnera, bocon di Sequals, ai 29 di Jugn dal ’33 sul ring di New York al salude la nomine a campion dal mont dai “pês massims”, ricuardant prime il Duce e daspò la mame. La Afriche Orientâl a pene concuistade tal ’36 e clame colons e operaris par vierzi gnûfs cantîrs. In Patrie invezit la gnove tiere prometude si le robe al palût, e cetantis fameis a fasin Sant Martin viers Carbonia, Littoria e Sabaudia, là che a vivin ancjemò i lôr dissendents. Ma ancje une vore plui dongje, a Sant Zorç di Noiâr, des lacjis di Tor di Zuin e nas une gnove citât industriâl, Torviscosa, screade tal 1938 cu la benedizion di Mussolini.
“Anade memorabil”, il ’38, pal Friûl: a finissin i lavôrs dal grant sacrari di Redipulie, monument tirât sù no tant par ricuardâ i muarts de prime vuere, ma pluitost par preparâ la bocje a ducj chei altris che a vignaran tal lamp di cualchi an. Ancje il Zîr di Italie al passe par Glemone, Vençon e Tumieç, cuasi par santificâ i sacris confins orientâi. Ma inte grande fieste di ducj chescj acjadiments, il “Popolo del Friuli” al celebre a gran vôs lis leçs raziâls cuintri i ebreus, a pene firmadis a Rome e preanunciadis a Triest di Benito in persone. L’autun dal 1938 al bat cussì une vergogne dure di netâ vie, che e fasarà colâ ancje dal cîl dal Friûl cualchi miâr di stelis zalis, tal scûr di une gnot bastarde e sassine che no podìn permetisi di dismenteâ. (A.F.)
Angelo Floramo
(L)Int Autonomiste / Al esam di maturitât cu lis dispensis sul nestri sît
Dree Valcic
✽✽ E je une grande buse intal percors che planc a planc al è daûr a fâ l’insegnament de lenghe furlane inte scuele. Plui che une buse o podaressin definîlu un gorc che al va a pericul di gloti ducj chei si movin in chest setôr fondamentâl de nestre culture identitarie.✽✽ Si cjatìn di fat […] lei di plui +
L'Editoriâl / Risierve di valôr
Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +
Salon Internazionâl dal Libri di Turin 2023
Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +
COROT. Nus à lassâts Sergio Salvi
Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +
Vuê al è il 3 di Avrîl, si fâs la Fieste de Patrie. Fûr la bandiere dal Friûl! Mandi a ducj i furlans! Buine Fieste de Patrie!
............
Chest an si davuelç ai 16 dal mês la celebrazion che e memoree l’inovâl dai 946 agns de nassite dal Stât Patriarcjâl 3 di Avrîl dal 1077: une date fondamentâl pe origjin de nestre identitât di popul furlan, dal moment che propit cheste zornade e je considerade in maniere uficiâl tant che chê de nassite […] lei di plui +
Glesie Furlane / Grop amîs di pre Toni. Program dai events pal 2023
1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +