Sfuei Mensîl Furlan Indipendent
Archivi de Patrie

Spietant un bloc sociâl a pro de Autonomie: interviste a Claudio Violino

............

Claudio Violino, conseîr de Lega Nord, in Consei regjonâl. La specialitât ise in pericul?
“Bisugne stâ cu lis orelis spiçadis. Plui che lâ a Rome par dî che o sin eficients e brâfs, al è impuartant pontâ i pîts e fâ capî che il Friûl al è alc di diviers di chês altris regjons”.
––
Duncje Serracchiani e sbalie strategjie?
“E varès di cognossi la storiute de torte. Cjape une torte, un bocon al è la autonomie che il Stât centrâl al scuen dâti a ti, regjon F-VJ. Crodistu che al Stât i frei cemût che tu lu spindis chel bocon? No ur interesse nuie se tu lu dopris ben o mâl. Il probleme al è che chel bocon no lu gjestissin lôr. E però ur fâs cetant gole”.
––
Ma la gole, la fam, al Stât cemût ise che bot e sclop i je vignude?
“Le àn simpri vude, ma cumò no ‘nd è bêçs. O stin vivint un moment pericolôs, pericolosissim di neocentralisim. Ducj i Stâts a stan passant un moment di crisi gjenerâl: no àn un control di ce che al sucêt, no rivin a comandâ lis multinazionâls economichis. Il Stât nol rive a stâ daûr al procès di globalizazion che al è in at. Duncje la logjiche e je: plui centris decisionâi a son te perifarie e mancul podê tu âs. Tocje ripuartâ lis decisions al centri par jessi competitîfs. Funzionassie! No darà risultâts se no chel di fâ saltâ ducj i passaçs storics che a àn puartât ae specialitât dal F-VJ. Po si zonte un altri fatôr: i compuartaments “spint e spant” di cierts conseis regjonâi, dulà che – al va dite – si à esagjerât. Ae fin, a paiâ a saran ancje lis regjons che a àn funzionât. E che no je la Sicilie, par intindisi”.
––
Cemût salvâle, inalore?
“Replicâ in mût fer che la nestre autonomie a è un pat costituzionâl tra Regjon F-VJ e Stât. E, di fat, cumò no vuelino cambiâ propite il pês dai podês? Il dissen di leç costituzionâl al fevele di “clausule di supremazie”: tal câs di un interès statâl, il Stât al interven e al bloche dut… ven a stâi, a blochin la autonomie, intervignint cence la intese”.
––
La assessore Panariti, ae fin di Fevrâr, e à fevelât di une negoziazion des competencis cun Rome in fat di istruzion, par une scuele a caratar regjonâl. La idee e je la unificazion dal pont di viste aministratîf dal Servizi di competence regjonâl cul Ufici Scolastic regjonâl, che al rispuint a Rome. Isal un prin pas?
“Al sarà ancje, ma nô o scugnìn pretindi come che al è in Sud Tirôl: une gjestion complete de scuele. Dacuardi, la suaze le pues definî il Stât, ma cu la plui largje autonomie tal reclutament dai professôrs su base regjonâl, sul lôr contrat e vie indevant. Une robe dal gjenar nus costarès 800 milions di euros l’an. Cheste de scuele e je une bataie che Serracchiani e varès di fâ di un pont di viste di president de regjon e ancjemò plui pal fat di jessi vice segretarie taliane dal Pd”.
––
E su la sanitât?
“Nô si le pain di bessôi, e e funzione. E pûr, su cierts aspiets o varessin ancjemò di lavorâ. Par esempli, il contrat di lavôr di miedis e paramiedis al ven decidût a Rome, nô lu cjapìn sù e vonde. Ma mi dîs: se o paìn nô, o varessin di vê la capacitât di intervignî su dute la filiere complete. Di cuant in ca esistie une competence a tocuts?”
Lis grandis infrastuturis invezit a son di competence dal Stât, ma al è il teritori a paiâ i presits plui grancj.
“Su chest pont o soi dacuardi cun ce che al à dit il senatôr Sonego dal Pd, al incuintri cui conseîrs regjonâi, a metât di Fevrâr. O paiarìn la tierce corsie cui nestris bêçs ancje se e coventarà plui a Rome e a Milan, che al Friûl. Ma propit par chel, a varessin di capî che la gjestion da nestre autonomie e je plui utile pe Italie e pe Europe che no pe nestre tiere, che tra l’altri e à ancje pocjis impresis furlanis che a lavorin. Sonego al à dite: o varìn di sielzi se stâ cun Rome o cu la Galie. E lui: “O starai cu la Galie”. Serracchiani i à fat notâ che Cesar al à asfaltât la Galie. Ma o ricognòs a Sonego un svicinament seri sul ûs des risorsis par fâ lis infrastruturis”.
––
Ce lu preocupial di plui?
“Che chi al mancje un bloc sociâl a pro de Autonomie”.
––
La specialitât a la int no i interessie?
“No sa ce che e je. Jo a cui che mi provoche disint che la Regjon no covente a nuie, i rispuint che in 50 agns no esist famee furlane che in medie no vedi ricevût almancul  50mil euros intun mût o inta chel altri, jenfri contribûts, agjevolazions, esenzions. Dacuardi, a jerin altris timps e o vevin plui risorsis, ma la classe dirigjente che e dipendeve di Rome e interpretave un bloc sociâl. Vuê al mancje cualchidun che al disi: no fantats, la autonomie no si le tocje”. ❚
Oscar Puntel

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +

L’EDITORIÂL / Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, […] lei di plui +