SPECIÂL. Vilotis in clâf moderne cun Antonella Ruggiero

«Ciantâ Vilotis», chest il titul des seradis li che la innomenade cjantante taliane Antonella Ruggiero e à cjantât in ladin, insiemit a altris grups di marilenghe.
I doi concierts a jerin stâts inmaneâts par publicizâ la publicazion dai trê volums de “racuelte Gardner”, a pene burîts fûr dal Istitût Culturâl Ladin “Majon di Fascegn”.
I spetacui si son davuelts a Canazei e a Trent ai 14 e ai 15 di Setembar, cuntune gruesse partecipazion di public. I cjants ladins e lis vilotis furlanis a son stâts interpretâts in clâf world music de Ruggiero, dutun cun MarMar Cuisine(Val Badie), Destrani Taraf (Trentin) e i “nestris” Loris Vescovo e Caia Grimaz.
O vin sintût propit Loris Vescovo par savê cemût che a son lâts i concierts.
Loris, vêso vût avonde public?
O disarès benon: a Canazei il teatri di 400 puescj al jere dut plen, a Trent scuasit, cui siei 800 puescj.
Cemût mai la Ruggiero aie cjantât par ladin, jê che e je di Gjenue?
Jê e veve za fat alc cun coros di chenti (dal 2005 il progjet “Echi d’infinito” cun doi coros trentins, rivisitant sedi tocs alpins che siei, eseguîts dome a vôs, ndr). Fabio Chiocchetti, president di “Majon di Fascegn”, si è visât – la idee e je stade sô – e le à coinvolzude in chest progjet: la Ruggiero e je une vore vierte a chestis operazions.
I concierts proviodino un cd?
Il progjet al è stât inmaneât par promovi i trê impuartants libris gjavâts fûr de racuelte Gardner (viôt box dongje, ndr), ma al è vignût cussì ben che il produtôr de Ruggiero (che al è ancje so om) al à gole di gjavâi fûr un cd. E je ancje la pussibilitât di creâ un spetacul par lâ ator, par esempli ancje in Friûl, stant che la plui part des cjantis a son Vilotis furlanis. Starìn a viodi.
Finalmentri tu sês tornât a cjantâ, dopo la esperience di presentadôr e atôr in «Sgarfefurlans» (radiodocumentari, viôt Patrie di Lui, ndr) e «Viaç te storie» (documentari pe regjie di Massimo Garlatti Costa, ndr). Cemût gjestissistu lis dôs “carieris”?
Par me no son tantis difarencis. Come “atôr” dai documentaris o conti une storie, ma ancje come cjantant mi consideri soredut un cjantestoriis. Di fat, tal prossim disc a saran cjançons ispiradis di storiis di int incuintrade propit fasint «Sgarfefurlans».
Dree Venier