Udin e la acuile sbaliade

Cuant che si à savût che lis maiis di riserve dal Udin a jerin zalis e blu e che su la maie e jere adiriture une acuile, la notizie e a à sorprindût cetancj di lôr. L’Udin e je la scuadre dai furlans, ma magari cussì no, no à mai dimostrât cetant di jessi la scuadre dal Friûl. Ni coltant cuissà ce il vivâr dai zovins, ne leantsi mai a teritori, la sô lenghe, la sô storie, di là dai “adempiments obligatoris”.
A la presentazion des gnovis divisis a metât di Lui, la gnove però si è subit disvelade une brute sorprese: la acuile no je chê dal Friûl, ma chê de Regjon F-VJ, duncje une “Udinese” che e rapresentarès parfin la Triestine.
Probabil che Pozzo al vedi cirût di fassi buine cussì la gnove dirigjence regjonâl, dopo che in campagne eletorâl al veve invidât a votâ l’aversari dal vincidôr Tondo, Riccardo Illy. Di fat l’Udin e à cedût il spazi su lis sôs divisis gratis.
A la societât però no i è lade drete e in tancj furlans a àn protestât sui gjornâi e in Internet par esempli sul blog udineseblog.it. Forsit une desine di agns za fa nol sarès sucedût, ma cumò la curve e je fisse di badieris furlanis, zalis e blu,
cu la acuile.
Il dg Leonardi al à cirût di distudâ lis polemichis fasint il tacon piês de buse: «il design des maiutis al è di competence des aziendis che a sponsorizin l’Udin. La acuile vignude fûr su lis maiis e je un simbul stilizât, dut chi»»
Insome, discjamâ la colpe e considerâlu un simbul cualsisei: l’Udin e dimostre come al solit di no savê che al esist il Friûl, se no che par supâ abonaments. Alè Udin!
Redazion